«قازاقتىڭ قاھارمان قىزى» اتتى مەرەكەلىك كونسەرت وتەدى.
ءساۋىردىڭ 13 كۇنى الماتىداعى قۇرمانعازى وركەسترىنىڭ كونسەرت زالىندا قازاقستاننىڭ حالىق ءارتيسى، حالىق قاھارمانى روزا باعلانوۆانىڭ 100 جىلدىق مەرەيتويىنا ارنالعان «قازاقتىڭ قاھارمان قىزى» اتتى مەرەكەلىك كونسەرت وتەدى، دەپ حابارلايدى Almaty-akshamy.kz.
كونسەرتتىك باعدارلامادا قازاقستاننىڭ حالىق ءارتيسى نۇرعالي ءنۇسىپجانوۆ، سۇلۋشاش نۇرماعانبەتوۆا، التىنبەك قورازبايەۆ، گۇلنار سيقىمبايەۆا، جۇبانىش جەكسەن ۇلى، جەڭىس ىسقاقوۆا، يگور بلاگودارنىي، ايگۇل يمانبايەۆا، اسحات ۇرپەكوۆ، شابا، باۋىرجان يسايەۆ، زارينا جاكەنوۆا سىندى ارتيستەر مەن قۇرمانعازى اتىنداعى قازاق ۇلتتىق وركەسترى ونەر كورسەتەدى.
«ايتا كەتەيىك، بۇل مەرەيتوي 1 ناۋرىز كۇنى مادەنيەت جانە سپورت مينيسترلىگىنە قاراستى «قازاق اۋەندەرى» اق-نىڭ ۇيىمداستىرۋىمەن ەلوردامىزداعى «قازاقستان» كونسەرت زالىندا باستاۋ العان ەدى. سول سالتاناتتى كونسەرتتە مادەنيەت جانە سپورت ءمينيسترى داۋرەن ابايەۆ مىرزا يۋنەسكو دەڭگەيىندە تويلاناتىن تۇلعالار تىزىمىنە ەنگەن داڭقتى ءانشىنىڭ عاسىرلىق تويى رەسمي تۇردە باستالعانىن ايرىقشا اتاپ ءوتىپ، مەرەيتوي رەسپۋبليكا كولەمىندەگى ءىس-شارالارعا ۇلاساتىنىن ايتقان بولاتىن. ەندى مىنە، روزا ءتاجىباي قىزى 1960 جىلدان باستاپ، ءومىرىنىڭ سوڭىنا دەيىن جەمىستى ەڭبەك ەتكەن "قازاقكونسەرتتىڭ" الماتىداعى بۇرىنعى عيماراتىندا، قازىرگى قۇرمانعازى وركەسترىنىڭ كونسەرت زالىندا كۇمىس كومەي ءانشىنىڭ تاماشا اندەرى شىرقالاتىن بولادى»، - دەلىنگەن مادەنيەت جانە سپورت مينيسترلىگىنىڭ باسپا ءسوز قىزمەتىنىڭ حابارلاماسىندا.
