بيىل بىرنەشە ۋنيۆەرسيتەتتە رەستاۆراتور ماماندىعى اشىلماق
ەلىمىزدە رەستاۆراسيا جانە كونسەرۆاسيا ورتالىعى اشىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
الماتىداعى «عىلىم ورداسىندا» قۇرىلعان ورتالىق رەستاۆراسيا سالاسىنا قاجەتتى ەڭ زاماناۋي 65 بىرلىك كاسىبي قۇرال-جابدىقپەن قامتىلعان. مۇندا حيميالىق زەرتحانا، تۇپتەۋ، عىلىمي-زەرتتەۋ، كارانتين جانە فوتو بولىمدەرى بار. اشىلۋ سالتاناتىنا ارنايى قاتىسقان عىلىم جانە جوعارى ءبىلىم ءمينيسترى ورتالىقتىڭ مۇمكىندىگىمەن تانىستى. مينيسترلىك بىلتىر وسى ورتالىقتى قۇرۋعا 500 ملن تەڭگە بولگەن. ماقسات – جيناقتالعان ەسكى دەرەكتەر مەن قولجازبالاردى ساقتاۋ، زەرتتەۋ.
«ءبىزدىڭ كونە تۇرىك تىلىنەن باستاپ، شاعاتاي، قىپشاق تىلىندە دەرەك وتە كوپ. ولاردىڭ كوبى بۇلىنگەنىنە بايلانىستى عىلىمي اينالىمعا ەنبەي جاتىر. نەگىزگى ماقساتىمىز – ءبارىن قالىپقا كەلتىرىپ، ساندىق فورماتقا كوشىرۋ»، – دەدى «عىلىم ورداسى» رمك باس ديرەكتورىنىڭ ورىنباسارى نۇرلان سەيدىن.
ورتالىقتا ەسكى كىتاپ پەن گازەت-جۋرنالدار، ارحيۆتىك قۇجاتتار رەتكە كەلتىرىلەدى. زاماناۋي جابدىقتاردىڭ كومەگىمەن ماماندار شاڭ باسىپ، توزعان قاعازدارعا دەزينفەكسيا جۇمىسىن جاساپ، ماتەريالدار مەن سيا ەرەكشەلىكتەرىنە قاراي زەرتتەۋ جۇرگىزە الادى. زەرتحانا جۇمىسقا ساقاداي ساي بولعانىمەن شارۋانى دوڭگەلەتەتىن بىلىكتى كادر تاپشى. ەلىمىزدەگى ءبىر دە ءبىر وقۋ ورنى رەستاۆراتور ماماندىعىن وقىتپايدى ەكەن. سوندىقتان ءقازىر مينيسترلىك رەسەيدەن رەستاۆراتور ماماندار الدىرىپ، كادر وقىتۋدى باستاپ كەتىپتى. ولقىلىقتى تۇبەگەيلى شەشۋ ءۇشىن بيىل بىرنەشە ۋنيۆەرسيتەتتە رەستاۆراتور ماماندىعى اشىلماق.
«قازىرگى تاڭدا باكالاۆرياتقا تولىق وقىتۋعا ادىستەمەلىك كۇشىمىز جەتپەيدى. ماگيستراتۋرا دەڭگەيىندە «مۇراجاي ءىسى»، «ارحيۆاريۋس» سياقتى ماماندىقتاردى ءسال وقىتىپ، رەستاۆراسياعا باعىتتاۋعا مۇمكىندىگىمىز جەتەدى. «بولاشاق» باعدارلاماسىنىڭ اياسىندا جانە 500 عىلىمي-تاعىلىمدامانىڭ اياسىندا وسى جىلدان باستاپ عىلىمي-رەستاۆراسيالىق ورتالىقتارعا ءوز مامانىمىزدى جىبەرۋدى باستايمىز»، – دەدى ق ر عىلىم جانە جوعارى ءبىلىم ءمينيسترى ساياسات نۇربەك.