رەيد بارىسىندا مال ۇرلىعى فاكتىلەرىنىڭ الدىن الۋ جۇمىستارى دا جۇرگىزىلىپ جاتىر
جەتىسۋ وبلىسىندا شالعايداعى شارۋا قوجالىقتارىن تەكسەرۋ باستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
جەتىسۋ پوليسيا قىزمەتكەرلەرى سوڭعى ون كۇندىكتە شالعايداعى فازەندالار مەن فەرمەرلىك شارۋاشىلىقتاردا زاڭسىز ساقتالعان 14 اتىس قارۋىن تاركىلەدى جانە ەلدە بولۋ ەرەجەلەرىن بۇزعان 16 شەتەل ازاماتتارىن انىقتادى. رەسمي مالىمەتتەرگە سايكەس، وبلىس اۋماعىندا مال شارۋاشىلىعىمەن اينالىساتىن 2300-گە جۋىق شارۋا قوجالىقتارى جۇمىس ىستەيدى. ولاردىڭ ءبىر بولىگى ەلدى مەكەندەردەن الىس جەردە، تاۋلى جانە دالا ايماعىندا ورنالاسقان.
– شارۋا قوجالىقتارىن ارالاپ شىعۋ جانە تەكسەرۋ جۇمىستارىن ارنايى توپ جۇرگىزۋدە، ونىڭ قۇرامىندا ۋچاسكەلىك ينسپەكتورلار، كوشى-قون قىزمەتى جانە باسقا دا پوليسيا بولىمشەلەرىنىڭ قىزمەتكەرلەرى بار. العاشقى ون كۇندە 1195 شارۋاشىلىق تەكسەرىلدى. وندا تىركەلمەگەن 11 تەگىس ۇڭعىلى مىلتىق، 2 ءيىر ويىقتى ۆينتوۆكا، 1 گاز تاپانشاسى تابىلدى جانە تاركىلەندى. سونداي-اق، شارۋا قوجالىقتارىنداعى جۇمىسكەرلەردىڭ اراسىندا كوشى-قون زاڭناماسىنىڭ تالاپتارىن ەلەمەي جۇرگەن شەتەل ازاماتتارى انىقتالدى، – دەدى وبلىس پد جپق باستىعى قايسار مۇحمەتوۆ.
رەيد بارىسىندا مال ۇرلىعى فاكتىلەرىنىڭ الدىن الۋ جۇمىستارى دا جۇرگىزىلىپ جاتىر. پوليسيا قىزمەتكەرلەرى وبلىستاعى بارلىق شارۋا قوجالىقتارىن، سونىڭ ىشىندە مالشىلاردىڭ تىركەلمەگەن قىستاۋلارى جانە قاراۋسىز قالعان قوي قورالارىن ارالاپ ءوتۋدى جوسپارلاپ وتىر.