بۇل تۋرالى مادەنيەت جانە سپورت ءمينيسترى اسحات ورالوۆ facebook پاراقشاسىندا جازدى.
تانىمال سپورتشىلاردى تاربيەلەگەن وقۋ ورنى بىلتىر جابىلىپ قالعان، دەپ حابارلايدى Almaty-akshamy.kz
«مينيسترلىككە كەلىپ تۇسكەن تۇيتكىلدى ماسەلەلەردى سارالاپ، شەشۋ جولدارىن قاراستىرىپ جاتىرمىن. سولاردىڭ ىشىندە ماڭىزدىسى – الماتىداعى «رەسپۋبليكالىق سپورت كوللەدجى» جانىنداعى مەكتەپ-ينتەرناتتىڭ جۇمىسىن قايتا جانداندىرۋعا قاتىستى اتا-انالار مەن ۇستازدار تاراپىنان تۇسكەن وتىنىشتەر. بىلتىر اتالعان وقۋ ورنى جابىلىپ، دارىندى وقۋشىلار، جاتتىقتىرۋشىلار مەن ۇستازدار باسقا ءبىلىم بەرۋ ۇيىمدارىنا جىبەرىلگەن ەدى. ماسەلەنى بىردەن تىكەلەي ءوز باقىلاۋىما الدىم»، – دەپ جازدى مينيستر.
بۇل وقۋ ورنىنان داۋلەت تۇرلىحانوۆ، ولگا شيشيگينا، يسلام بايرامۋكوۆ پەن باسقا دا اتاقتى سپورتشىلار تۇلەپ ۇشقان ەدى. ءمينيستردىڭ ايتۋىنشا، سول سەبەپتەن بۇل مەكتەپتىڭ بازاسى مىقتى، وقىتۋشىلارى ءالى دە كوپتەگەن تالانتتى سپورتشىلاردى دايىندايتىن بولادى. سوندىقتان مەكتەپتى جابۋ تۋرالى شەشىم قايتا قاراستىرىلدى.
مينيسترلىك ليسەنزيانى قايتارۋ بويىنشا اۋقىمدى جۇمىس جۇرگىزدى. بۇگىندە ءبىلىم ورداسى وقۋعا قۇجاتتار قابىلداۋدى باستاپ كەتتى. مەكتەپكە جۇزدەگەن بالا قابىلدانىپ، ونداعان كاسىبي وقىتۋشى مەن جاتتىقتىرۋشى جۇمىسپەن قامتىلادى. ينتەرناتتىڭ دايىندىق جۇمىستارىن كورىپ، وقۋ كابينەتتەرىنىڭ جابدىقتالۋىن، كىتاپتارمەن قامتىلۋىن، جاتاقحاناداعى ورىنداردىڭ جاي-كۇيىمەن تانىسۋ ءۇشىن ارنايى باردىم. سونىمەن بىرگە، مۇعالىمدەردىڭ ءتىزىمى، ساباق كەستەسى مەن كۇن ءتارتىبى بەكىتىلدى.
مينيستر بۇگىندە مەملەكەت باسشىسى بالالار سپورتىن دامىتۋعا ايرىقشا نازار اۋدارىپ وتىرعانىن، مادەنيەت جانە سپورت مينيسترلىگى سپورتپەن اينالىسقىسى كەلەتىن بالالاردى جولدا قالدىرماي، ولارعا قولدا بار جاعدايدى جاساۋدى ەشقاشان نازاردان تىس قالمايتىنىن اتاپ ءوتتى.
«بولاشاق بۇگىننەن باستالاتىنىن ەسكەرسەك، ەل مەرەيىن اسىرار ەرتەڭگى چەمپيوندارىمىزعا قاجەتتى جاعدايدى ءدال ءقازىر جاساۋعا ءتيىسپىز»، – دەا جازدى ول.