الماتىدا رەسەيلىك ەكى جولاۋشى جولدان قالدى

الماتىدا رف-نىڭ ماساڭ كۇيدەگى ەكى ازاماتى اۋە رەيسىنەن ءتۇسىرىلدى.

الماتى قالاسى اۋەجايىنداعى جەلىلىك پوليسيا ءبولىمىنىڭ قىزمەتكەرلەرىنە Air Astana اۋەاكومپانياسى وكىلىنىڭ اكتىسى بويىنشا ەكى جولاۋشى بەرىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

ونىڭ ايتۋىنشا، ەر ادامدار الماتى – استانا باعىتىنداعى اۋە رەيسىنە وتىرعىزۋ كەزىندە وزدەرىن دورەكى ۇستاپ، بورتسەرىكتەردى بالاعاتتاعان.

كولىك پوليسەيلەرى تەكسەرۋ كەزىندە ماساڭ كۇيدە بولعان 34 جاستاعى رەسەي فەدەراسياسىنىڭ ەكى ازاماتىن انىقتادى. مەديسينالىق كۋالاندىرۋدىڭ ناتيجەسى بويىنشا ولار “ورتاشا” جانە “جەڭىل دارەجەدەگى” ماساڭ كۇيدە بولعان. قۇقىق بۇزۋشىلارعا قاتىستى ق ر اقبتك-نىڭ 440-بابى مەن 434-بابى بويىنشا اكىمشىلىك ماتەريال تولتىرىلىپ، 5 اەك مولشەرىندە ايىپپۇل سالىندى.

ۇساق بۇزاقىلىق بويىنشا ماتەريال ءتيىستى شەشىم قابىلداۋ ءۇشىن الماتى قالاسىنىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتىنا جولداناتىن بولادى. ەستەرىڭىزگە سالا كەتەيىك، جىل باسىنان بەرى ەلىمىزدىڭ كولىك پوليسەيلەرى ءتۇرلى اكىمشىلىك قۇقىق بۇزۋشىلىقتار جاساعانى ءۇشىن 12 539 ازاماتتى اكىمشىلىك جاۋاپكەرشىلىككە تارتتى، ونىڭ ىشىندە الكوگولدىك ىشىمدىكتەردى iشكەنى نەمەسە قوعامدىق ورىندارعا ماساڭ كۇيدە كەلگەنى ءۇشىن 1429 ادام، ۇساق بۇزاقىلىق ءۇشىن 179 ادام جاۋاپقا تارتىلعان.