الماتىدا جاسوسپىرىمدەر مەن جاستارعا تەگىن ءارى جاسىرىن كومەك كورسەتەتىن جاستاردىڭ 14 ورتالىعى جۇمىc ىستەيدى
مامىر ايىنىڭ 12-16 ارالىعىندا، پرەزيدەنتتىڭ جانىنداعى ۇلتتىق كوميسسيانىڭ قولداۋىمەن قازاقستاندا رەسپۋبليكالىق رەپرودۋكتيۆتى دەنساۋلىق اپتاسى وتپەك. بۇل باستاماعا الماتى دا قوسىلدى. وڭىرلىك كوممۋنيكاسيالار قىزمەتىندەگى پرەسس-كونفەرەنسيادا الداعى وسى اپتانىڭ قالاي وتەتىنىن ايتتى، دەپ حابارلايدى aqshamnews.kz
الماتى ءماسليحاتىنىڭ دەپۋتاتى، اكىمنىڭ گەندەرلىك ماسەلە جونىندەگى شتاتتان تىس كەڭەسشىسى ايگۇل شالبايەۆانىڭ ايتۋىنشا، الماتى بۇل اكسيانى قولداپ قانا قويماي، ۇلكەن ءىس-شارالار دا وتكىزبەك.
«مەكتەپتەردە، كوللەدجدەر مەن وقۋ ورىندارىندا ءقازىر ءارتۇرلى كەزدەسۋ مەن اشىق ەسىك كۇندەرى ءوتىپ، دارىگەرلەر قاراپ، لەكسيالار ءوتىپ، جاسوسپىرىمدەرمەن، ولاردىڭ اتا-اناسىمەن، مۇعالىمدەرمەن سويلەسىپ جاتىرمىز. بۇل قۇلاقتاندىرۋ جۇمىسى عانا ەمەس، دەنساۋلىققا جاۋاپتى قاراۋعا شاقىرىپ، وسىعان قوعامنىڭ نازارىن اۋدارماقپىز»، - دەيدى ايگۇل شالبايەۆا.
ەكسپەرتتەر مۇنداي ءىس-شارانى وتكىزۋدىڭ پايداسى كوپ ەكەنىنە توقتالدى. زەرتتەۋگە قاراعاندا، ايتۆ تۋرالى جاسوسپىرىمدەردىڭ 9 پايىزى عانا تولىق بىلسە، اركىمنىڭ ايتقانىنا سەنىپ، اداسىپ جۇرگەن 60 پايىزى ودان قالاي ساقتانىپ، جۇكتىلىكتەن قالاي قورعانۋ كەرەكتىگىن مۇلدەم بىلمەيدى.
«ءبىز وسىنى اشىق ايتىپ، كوزىن اشقىمىز كەلەدى قوعامنىڭ. بۇل جۇمىسقا مامانداردى، دارىگەرلەردى، جۇرگىزۋشىلەردى، ەرىكتىلەردى، ب ا ق وكىلدەرى مەن اتا-انالاردى دا تارتىپ جاتىرمىز سوندىقتان. چات-بوتتار، سيفرلىق رەسۋرستار ارقىلى، حالىقپەن بەتپە-بەت كەزدەسىپ، ب ا ق ارقىلى دا وسىنى جان-جاقتى ءتۇسىندىرۋدى قولعا الدىق ءقازىر»، - دەدى دەپۋتات.
جاستار دەنساۋلىعى ورتالىقتارىندا اشىق ءىس-شارالار، لەكسيالار ءوتىپ، جاسوسپىرىمدەرمەن اڭگىمەلەسىپ، ولارعا وسى جۇكتىلىك جاسى، پسيحيكالىق كوڭىل-كۇيى تۋرالى جان-جاقتى اقپارات بەرىلەدى.
قالادا ءقازىر تەراپيەۆت، گينەكولوگ، ۋرولوگ، دەرماتولوگ، الەۋمەتتىك قىزمەتكەر، زاڭگەر سياقتى 128 مامانى بار وسىنداي 14 ورتالىق جۇمىس ىستەپ جاتىر.
«ورتالىقتار «4-د» نەگىزدەمەسىمەن جۇمىس ىستەيدى. ياعني، بارىنشا اشىق بولىپ، بىر-بىرىنە دەگەن سەنىم قالىپتاسادى وندا. بۇل دەگەن ءمامس اياسىندا تەگىن قىزمەت كورسەتۋ، سىر اقتارىپ، جاستاردى مازالاعان ماسەلە تۋرالى وي ءبولىسىپ، سۇقباتتاسۋ دەگەن ءسوز»، - دەيدى، الماتىنىڭ قوعامدىق دەنساۋلىق باسقارماسىنىڭ جدو-نى دامىتۋ جونىندەگى ۇيلەستىرۋشىسى دينا قۇسايىنوۆا.
جاستار دەنساۋلىعى ورتالىعىندا مىنانداي قىزمەت كورسەتەدى:
- كونتراسەپسيا، وتباسىن جوسپارلاۋ، ايتۆ، جججي تۋرالى كەڭەس بەرەدى؛
- جۇقپالى اۋرۋدى انىقتاپ، ونى ەمدەۋدى؛
- زورلىققا ۇشىراعاندارعا قولداۋ كورسەتۋدى؛
- ادامنىڭ كوڭى-كۇيىنە قاراي كەڭەس بەرىپ، الەۋمەتتىك بەيىمدەۋدى؛
- زاڭگەردىڭ كومەگى؛
- اۋرۋدىڭ الدىن الۋ، لەكسيالار مەن ترەنينگتەر وتكىزۋ، ونىڭ ىشىندە ءسوس بايلانىستى ماسەلەلەر دە بار.
جاستار دەنساۋلىعى ورتالىعىندا ارت-تەراپيانىڭ، وزىنە قول جۇمساۋعا بەيىم تۇراتىن ادامدارعا قول ۇشىن بەرەتىندەردىڭ، جۇكتىلەرگە ترەنينگ جاسايتىندار مەن كوپشىلىككە كەڭەس بەرەتىن پسيحولوگتاردىڭ ورنى ەرەكشە.
«ورتالىقتا بۇدان بولەك 4ء-شى بۋىنداعى جاڭا تەست-جولاقپەن ايتۆ-عا دا تەست تاپسىرادى. تەستىلەۋ ءۇش كەزەڭنەن تۇرادى. ولار – باسىندا، ءىس-شارادان كەيىن، سوسىن سپيد ورتالىعىنا جىبەرگەندە»، - دەيدى دينا قۇسايىنوۆا.
جاستار جاعى ناقتى ءبىر ەمحاناعا بەكىتىلمەي-اق، ورتالىققا كەلىپ قارالا بەرسە بولادى. ءبارىن قۇپيا ۇستاعىسى كەلگەندەردىڭ جەكە باسى تۋرالى مالىمەت ەش جەردە جاريالانبايدى.