الماتىدا ساراپشىلار رايىمبەك داڭعىلىنداعى BRT قۇرىلىسىن بىرنەشە كەزەڭگە ءبولۋدى ۇسىندى
الماتىدا كولىك سالاسىنداعى ساراپشىلار، ۋربانيستەر جانە ب ا ق وكىلدەرى رايىمبەك داڭعىلىندا پۋشكين كوشەسىنەن سەيفۋللين داڭعىلىنا دەيىنگى BRT ءدالىزىنىڭ ءبىرىنشى ۋچاسكەسىنىڭ جوباسى ۇسىنىلعان دوڭگەلەك ۇستەل ءوتتى، دەپ حابارلايدى aqshamnews.kz
جوبانى حالىقارالىق كونسۋلتانتتار مەن الماتى كولىك جۇيەسىن دامىتۋ جوبالىق كەڭسەسىنىڭ قولداۋىمەن «الماتىباسجوسپار» عىلىمي-زەرتتەۋ ينستيتۋتى ازىرلەدى.
ازىرلەۋشىلەردىڭ ايتۋىنشا، جوبا اياسىندا مينيمالدى ۇزىلىستەرمەن ارنايى جولاقتار جاساۋ، جاڭا ايالداما كەشەندەرىن ورناتۋ، سونداي-اق «قاسبەتتەن قاسبەتكە دەيىن» قاعيداتى بويىنشا داڭعىل بويىن كەشەندى كورىكتەندىرۋ كوزدەلگەن.
«قاقتىعىس نۇكتەلەرى از بولاتىن ۋچاسكەلەردە ارنايى جولاقتار جولدىڭ شەتىندە بولادى. تۇراق ورىندارىن ساقتاۋ قاجەت نەمەسە كورشى اۋماقتاردان شىعاتىن جولدار كوپ بولعان جەرلەردە، ارنايى جولاقتار بۋلۆار بولىگىنىڭ بويىندا ورنالاسادى. وسىلايشا، بارلىق قوزعالىس قاتىسۋشىسىنىڭ مۇددەسى بارىنشا ەسكەرىلەدى. ايالدامالاردى پلاتفورمالاردا جابدىقتاپ، قيىلىستارعا جاقىن ورنالاستىرۋ جوسپارلانۋدا. بۇل رەتتە، اۆتوكولىكتەردىڭ نەگىزگى جولاقتارى ساقتالادى»، - دەدى «الماتىباسجوسپار» باسشىسى اسحات ءسادۋوۆ.
سونىمەن قاتار، ونىڭ ايتۋىنشا، بيىل قونايەۆ كوشەسىنەن چايكوۆسكيي كوشەسىنە دەيىنگى بۋلۆارلىق بولىكتى كورىكتەندىرۋ جۇمىستارى جۇرگىزىلەدى.
«ءبىز كوشەنى «قاسبەتتەن قاسبەتكە دەيىن» قاعيداسى بويىنشا جوبالادىق، ياعني تەك جول بولىگىن عانا ەمەس، سونىمەن قاتار تروتۋارلاردى، اۋلالارىن، كوگالداندىرۋدى دا قامتىدىق. قاسبەتتەر ءبىرىڭعاي ديزاين-كودقا كەلتىرىلەدى. جوبانىڭ مەملەكەتتىك ساراپتاماسى شىلدە ايىنىڭ ورتاسىندا عانا اياقتالدى، ءبىز ارينە، قورىتىندىنى ەرتەرەك الامىز دەگەن ەدىك، ءبىراق «كەشەندىلىكتى» ەسكەرىپ، جوبانى ەكى رەت جاساۋعا تۋرا كەلدى. قىركۇيەك ايىندا سەيفۋللين داڭعىلىنان احريمەنكو كوشەسىنە دەيىنگى جانە احريمەنكو كوشەسىنەن «بارلىق» بازارىنا دەيىنگى BRT ءدالىزىنىڭ ەكىنشى بويىنشا جوبالاۋ جۇمىستارى اياقتالادى دەپ كۇتىلۋدە»، - دەدى اسحات ءسادۋوۆ.
ءوز كەزەگىندە كەزدەسۋگە قاتىسقان ساراپشىلار بۇل جوبانىڭ الماتىنىڭ قوعامدىق كولىك جۇيەسىن دامىتۋ جانە قالا تۇرعىندارىنىڭ موبيلدىگىن ارتتىرۋ ءۇشىن ماڭىزدىلىعىن اتاپ ءوتتى. ولاردىڭ پىكىرىنشە، 2030 جىلعا دەيىن قالانىڭ كولىك قاڭقاسىنىڭ بەكىتىلگەن شەبەر جوسپارى اياسىندا ازىرلەنگەن رايىمبەك داڭعىلى بويىنشا BRT ءدالىزى جوعارى تالاپتارعا جاۋاپ بەرەدى جانە ول قالا تۇرعىندارىنىڭ كوڭىلىنەن شىعادى.
«BRT ءدالىزى شىنىمەن دە قوعامدىق كولىكتىڭ تارتىمدىلىعىن ارتتىرا الادى، بۇل فاكت. ءبىراق ءبىزدى ونىڭ جۇزەگە اسىرىلۋ مەرزىمى الاڭداتادى. رايىمبەك – كولىك وتە كوپ جۇرەتىن كوشە، قىركۇيەكتە ساباق باستالىپ، ستۋدەنتتەر كەلەدى جانە ەگەر ءدال وسى كەزەڭدە قۇرىلىس جۇمىستارىن باستاساق، كوللاپس بولادى دەپ ويلايمىن. سوندىقتان، جۇمىستى كەلەسى جىلى باستاعان دۇرىس ەمەس پە؟»، - دەدى «جالپى جول» قاۋىمداستىعىنىڭ جەتەكشىسى ارسەن شاكۋوۆ.
رومان بارابانوۆتىڭ پىكىرىنشە، بۇكىل كوشەنى بىردەن رەكونسترۋكسيالاۋ ورىندى بولار ەدى.
«داڭعىلدى بىرنەشە سەگمەنتكە ءبولىپ، ءارقايسىسىنا ءارتۇرلى مەردىگەرلەردى انىقتاۋ مەنىڭ ويىمشا قيسىنسىز. مۇنداي جاعدايدا باقىلاۋ جانە ساپانى قامتاماسىز ەتۋ قيىن بولادى. ەگەر ءبولىپ ىستەسەڭىز، جوبا جۇمىس ىستەمەيدى. BRT ءدالىزى ءتيىمدى بولۋى ءۇشىن بۇكىل داڭعىلدى رەكونسترۋكسيالاۋعا تىرىسۋ كەرەك، ەڭ بولماعاندا كەيبىر ايماقتى الدىمەن تاڭبالاپ جاساۋعا بولادى»، - دەدى رومان بارابانوۆ.
تالقىلاۋ قورىتىندىسى بويىنشا، ساراپشىلار قاۋىمداستىعىنىڭ پىكىرىن ەسكەرە وتىرىپ جانە قالا تۇرعىندارى ءۇشىن قولايسىزدىقتى ازايتۋ ماقساتىندا جوبا بويىنشا قۇرىلىس-مونتاجداۋ جۇمىستارىن كەلەسى جىلدىڭ ءساۋىر ايىندا باستاۋ تۋرالى شەشىم قابىلداندى.
«كۇزدە ءبىز BRT ءدالىزىنىڭ ءبىرىنشى كەزەڭىنىڭ ەكى ۋچاسكەسىنە، ياعني پۋشكين كوشەسىنەن سەيفۋللين داڭعىلىنا دەيىن جانە سەيفۋللين داڭعىلىنان احريمەنكو كوشەسىنە دەيىنگى مەردىگەر ۇيىمدى انىقتاۋ ءۇشىن بايقاۋ جاريالاۋدى جوسپارلاپ وتىرمىز. بيىل ينجەنەرلىك جەلىلەردى قايتا قۇرۋ، ءوستى ءبولۋ سياقتى دايىندىق جۇمىستارىن باستاپ، «ساياحات» ماڭىندا ءىرى ايالداما كەشەندەرىنىڭ قۇرىلىسىن اياقتايمىز. ال ەكى ۋچاسكە بويىنشا نەگىزگى قۇرىلىس-مونتاجداۋ جۇمىستارىن كەلەسى قۇرىلىس ماۋسىمىنان باستايمىز»، - دەدى قالالىق موبيلدىلىك باسقارماسىنىڭ باسشىسى ساعىندىق تەلىبايەۆ.