2023 جىلعى 19 ساۋىردەن باستاپ جۇرگىزۋشىلەرگە رايىمبەك داڭعىلى بويىنشا ساين كوشەسىنەن ياسساۋي كوشەسىنە دەيىن جۇمىس كۇندەرى ساعات 20:00-دەن 06:30-عا دەيىن جول ۋچاسكەسىندە قوعامدىق كولىك ءۇشىن بولىنگەن جولاقتار بويىنشا جول جۇرۋگە رۇقسات ەتىلەدى.
بۇل تۋرالى الماتى قالالىق موبيلدىلىك باسقارماسى مالىمدەدى، دەپ حابارلايدى Almaty-akshamy.kz.
دەمالىس جانە مەرەكە كۇندەرى وسى ۋچاسكەدە بارلىق اۆتوموبيلدەرە ۋاقىت شەكتەۋىنسىز جول جۇرە الادى.
كولىك قوزعالىسىنا وسى جاڭالىقتىڭ ەنگىزىلۋى قالا ىشىندەگى اۆتوموبيل لەگىن ءتيىمدى قۇرۋ ءۇشىن، سونداي-اق "قاربالاس شاقتا" جانە دەمالىس كۇندەرى ارنايى بولىنگەن اۆتوبۋس جولاقتارىن پايدالانۋ ماسەلەسىن شەشۋ ءۇشىن تەستىلىك رەجيمدە ەنگىزىلەتىن بولادى.
بولىنگەن جولاقتار بويىنشا كولىك قۇرالدارىنىڭ قوزعالىسىن وزگەرتۋ 2023 جىلدىڭ سوڭىنا دەيىن كۇشىندە بولادى. سودان سوڭ سالىستىرمالى دەرەكتەر نەگىزىندە كولىك لەگىن ۇيىمداستىرۋ تۋرالى شەشىم قابىلدانادى. جۇرگىزۋشىلەر بەلگىلەنگەن جول بەلگىلەرىن باسشىلىققا الىپ، ق ر جول قوزعالىسى ەرەجەلەرىنىڭ تالاپتارىن ساقتاۋلارى ءتيىس.
ەسكە سالساق، بۇل شارا پيلوتتىق جوبانىڭ ەكىنشى كەزەڭى بولىپ تابىلادى. 2022 جىلدىڭ ناۋرىزىندا قوعامدىق كولىككە بولىنگەن جولاقتار بويىنشا جول قوزعالىسىن ۇيىمداستىرۋدىڭ قولدانىستاعى سىزباسىنا وزگەرىس ەنگىزىلدى.
