رەسپۋبليكا بويىنشا جىل باسىنان بەرى قىزىلشا اۋرۋىن جۇقتىرۋ قاۋپىنە قاتىستى 300-دەن استام دەرەكتىڭ 200ء-ى راستالدى.
ماماندار ەلىمىزدە ەپيدەميولوگيالىق جاعداي ءماز ەمەس دەپ دابىل قاعىپ وتىر. اۋرۋ ءورشىپ تۇرعان ءوڭىردىڭ ءبىرى - الماتى. مۇندا 130-عا جۋىق ادامعا قىزىلشا دياگنوزى قويىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
ونىڭ باسىم بولىگى - بالالار. دارىگەرلەر اۋىرعانداردىڭ بارلىعى قىزىلشاعا قارسى ەكپە الماعان دەيدى. مامانداردىڭ ايتۋىنشا، ۆاكسينا سالدىرماعاندار اراسىندا ىندەت اۋىر وتەدى.
«كوپ جاعدايدا وكپەنىڭ قابىنۋى ۆيرۋستىق پنيەۆمونيا، بۇدان كەيىن كەزدەسەتىن بالالاردىڭ، اسىرەسە، ەگىلمەگەن بالالاردىڭ كوزىنە زاقىم كەلۋى مۇمكىن كونيۋكتيۆيت تۇرىندە. بالالار سوقىرلىققا ۇشىراۋى مۇمكىن. ودان كەيىن بىرنەشە جىلدان كەيىن بولاتىن اسقىنۋلار بار. مىسالى، ەنسەفاليت ميدىڭ قابىنۋى. بۇل - جازىلمايتىن اۋرۋ»، - دەيدى مەملەكەتتىك سانيتاريلىق-ەپيدەميولوگيالىق باقىلاۋ كوميتەتى باسقارماسىنىڭ باسشىسى نۇرشاي ازىمبايەۆا.
قىزىلشاعا قارسى ەكپە بالانىڭ ءبىر جاسىندا، ودان كەيىن التىعا كەلگەندە سالىنادى. بۇدان سوڭ اۋرۋدان قورعانىش كورسەتكىشى 95 پروسەنتكە جوعارىلايدى. دارىگەرلەردىڭ ايتۋىنشا، ونىڭ بەلگىلەرى سۋىق ءتيۋدىڭ بەلگىلەرىنە وتە ۇقساس. بورتپە شىققان كۇننىڭ وزىندە ناقتى دياگنوزى زەرتحانالىق ساراپتامادان سوڭ بەلگىلى بولادى. اسىرەسە، وعان 5 جاسقا دەيىنگى بالالار كوپ شالدىعادى.
«زيان دەپ ويلايدى. سەبەبى ءارتۇرلى جەلىدە ءتۇرلى اقپارات، بۇرمالانعان اقپارات جۇرەدى. سولاردى ەستىپ العان اتا-انالار، كوبىسى ءدىني اعىمداعى اتا-انالار بار، سونداي اتا-انالار ۋاقىتىندا سول ەكپەنى الماي قارسى نە جازىپ بەرگەن بولاتىن. ەپيدەميولوگيالىق جاعدايدىڭ ورشۋىنە بايلانىستى وسىنداي بالالاردىڭ اتا-انالارىمەن جۇمىس جاساپ جاتىرمىز»، - دەيدى دارىگەر ۇلجان قۇرمانايەۆا.
ءيا، اتا-انالاردىڭ كەيبىرى اۋىرعان بالادا يممۋنيتەت قالىپتاسادى، دەپ ويلايدى. ءبىراق ول قالىپتاسقانىمەن ينفەكسيا ادام اعزاسىندا كوپ جىل بويى ساقتالادى. السىرەگەن كەزدە قايتا بەلەڭ الىپ، باسقا دا سوزىلمالى اۋرۋلاردىڭ باس كوتەرۋىنە الىپ كەلەدى. ماماندار اۋىرۋ ارقىلى يممۋنيتەت قالىپتاستىرسا بۇل جاعدايدا ءبىر پايىزدان التى پايىزعا دەيىن اسقىنۋلار كەزدەسۋى مۇمكىن ەكەندىگىن العا تارتادى. اۋىرىپ يممۋنيتەت العاننان، اۋىرماي ۆاكسينا قالىپتاستىرعان دۇرىس دەيدى ولار.
قىزىلشا اۋا تامشىلارى ارقىلى ادامنان-ادامعا تەز تارايدى. ەگەر دە حالىقتىڭ 90 پروسەنتى ەگىلگەن بولسا، تارالماي توقتاپ قالۋى مۇمكىن.
2019 جىلى ەلىمىزدە قىزىلشادان 21 ادام كوز جۇمعان. ونىڭ 19-ى بالا.