الماتىدا قىلمىستىق احۋال تۇراقتى

2022 جىلدىڭ قورىتىندىسى بويىنشا، قالاداعى قىلمىس سانى ازايعان.

قىلمىستىق قۇقىقبۇزۋشىلىقتاردىڭ جالپى اشىلۋى جاقساردى. ماس كۇيىندە جاسالعان زاڭسىز ارەكەتتەر سانى 17،3%-عا، قوعامدىق ورىنداردا 4،1%-عا، سونداي-اق شەشىلمەگەن جانە وتەلمەگەن ءىستى بولعان ادامداردىڭ جاساعان زاڭسىز ارەكەتتەرىنىڭ سانى ازايدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«جالپى، دەپارتامەنتتىڭ جەكە قۇرامى شاھاردا ءتيىستى قوعامدىق ءتارتىپتى قامتاماسىز ەتىپ، قالاداعى قىلمىستى ازايتۋ ءۇشىن بارلىق قاجەتتى شارالاردى قابىلداپ جاتىر. ناتيجەسىندە توناۋمەن اينالىسقان 17 توپتىڭ، 65 قاراقشىلىق شابۋىلدىڭ، 13 كولىگىن ۇرلاعانداردىڭ، 33 پاتەر ۇرلىعىمەن اينالىسقانداردىڭ، 20 اۆتوكولىكتەردىڭ ىشىنەن ۇرلاعانداردىڭ، 159-ى قوعامدىق ورىنداردا جەكە مۇلىكتى ۇرلاعانداردىڭ قىلمىستىق جولى كەسىلدى»، – دەدى، الماتى قالالىق پوليسيا دەپارتامەنتىنىڭ باستىعى، پوليسيا گەنەرال-مايورى ا. زاپپاروۆ.

زورلاۋ سانى 3،4%-عا، پاتەرلەردەگى ۇرلىق 6،5%-عا، قالتا ۇرلىعى 2،6 ەسە، كولىكتىڭ سالونىنان ۇرلىق 2،3 ەسە، ال ينتەرنەتتەگى الاياقتىق 28،4%-عا ازايدى.