الماتىدا قىلمىس سانى تومەندەگەن

مۇنداي كورسەتكىش 2022 جىلدىڭ قورىتىندىسىنا سايكەس شىعارىلىپ وتىر. 

ەگەر ءبىرىنشى توقساندا كۇن سايىن ورتا ەسەپپەن 120 قىلمىس جاسالسا، جەلتوقسان ايىنىڭ سوڭىندا بۇل كورسەتكىش 60-قا دەيىن تومەندەدى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«قالاداعى قىلمىستى ازايتۋ ءۇشىن قوسىمشا شارالار قابىلداۋدامىز. كريمينوگەندىك جاعدايدى تالداۋعا سايكەس، پوليسيانىڭ جەكەلەگەن مودۋلدىك پوستتارى قۇقىق بۇزۋشىلىقتار كوپ ورىن الاتىن جەرلەرگە كوشىرىلدى. سونداي-اق قالا جولدارىندا جانە اۋلالارىندا الدىن الۋ شارالارى كۇشەيتىلىپ، جاياۋ پاترۋلدەۋ جۇمىستارى جۇرگىزىلىپ جاتىر. كۇشتەر مەن قۇرالداردى مانيەۆرلەۋ كريمينوگەندىك جاعدايدى تالداۋدى ەسكەرە وتىرىپ، جەدەل جۇزەگە اسىرىلادى. سونىمەن قاتار جاپپاي تارتىپسىزدىكتەر كەزىندە ۇرلانعان جانە جوعالعان قارۋلاردى ىزدەۋ جۇمىستارىن جالعاستىرۋدامىز. جالپى، الماتى پوليسياسىنىڭ جەكە قۇرامى شاھارداعى قوعامدىق ءتارتىپتى قامتاماسىز ەتىپ، قالاداعى قىلمىستى ازايتۋ ءۇشىن بارلىق قاجەتتى شارالاردى قابىلداپ جاتىر. ءبىز ءوز الدىمىزعا قالا تۇرعىندارىن قاۋىپسىزدىك سەزىمىمەن قامتاماسىز ەتۋدى ماقسات ەتىپ قويدىق. بۇل مىندەتتى قوعاممەن بىرلەسە وتىرىپ، اتقارا الامىز»، – دەدى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.

قابىلدانعان شارالاردىڭ ناتيجەسىندە الماتى پوليسياسى قاراقشىلىق شابۋىل، توناۋ، بوتەن ادامداردىڭ كولىكتەرىن ۇرلاۋ، پاتەر توناۋ، قوعامدىق ورىنداردا اۆتوكولىكتەر مەن جەكە مۇلىكتەردى ۇرلاۋمەن اينالىسقان 307 قىلمىستىق توپتىڭ قىلمىستىق ارەكەتىنىڭ جولىن كەستى. سونداي-اق، 638 ۇرلىقتى جاساعانى دالەلدەنگەن 391 ۇرى ۇستالدى.