قازاقستاندىق سپورتشىلاردىڭ باسىم بولىگى ءساتتى ونەر كورسەتتى.
الماتىدا تۇڭعىش رەت قۇزعا ورمەلەۋدەن جاستار اراسىندا ورتالىق ازيا چەمپيوناتىنىڭ اشىلۋى ءوتتى. وعان قازاقستان، وزبەكستان، قىرعىزستان جانە تاجىكستان ەلدەرىنەن بارلىعى 100-دەن استام سپورتشى قاتىسىپ، ب ا ق سىنايدى، دەپ حابارلايدى Almaty-akshamy.kz Almaty.tv سىلتەمە جاساپ.
جارىستىڭ العاشقى كۇنى قاتىسۋشىلار 4 توپقا ءبولىنىپ، قۇزعا ورمەلەۋدىڭ 2 تۇرىنەن، ياعني «جىلدامدىق» پەن «قيىندىق» بويىنشا سايىسقا ءتۇستى. قازاقستاندىق سپورتشىلاردىڭ باسىم بولىگى ءساتتى ونەر كورسەتىپ، جارتىلاي فينالعا جولداما الدى. ناتيجەسىندە جۇلدەلى ورىنداردىڭ ۇشەۋى دە الماتىلىقتارعا بۇيىرىپ، 14 جاستاعى دامير توقتاروۆ جارىس جەڭىمپازى اتاندى.
«مەن بولاشاقتا وليمپيادا چەمپيونى بولعىم كەلەدى. قازاقستاننىڭ كوك تۋىن الەمگە كورسەتىپ، ءانۇرانىن شىرقاتامىن دەگەن ماقساتىم بار»، – دەدى جارىس جەڭىمپازى دامير توقتاروۆ.
ۇيىمداستىرۋشىلار بۇگىندە قۇزعا ورمەلەۋدىڭ ەلىمىزدە دامىپ كەلە جاتقانىن ايتادى. اسىرەسە، الماتى، نۇر-سۇلتان جانە شىمكەنتتە اتالمىش سپورتپەن اۋەستەنەتىندەر كوپ. سونىڭ ارقاسىندا ءقازىر ورتا ازيادا ءفاۆوريتپىز دەيدى جاتتىقتىرۋشىلار.
«مىنا ازيا جانە حالىقارالىق فەدەراسيالار بىزگە جارىس وتكىزىڭدەر دەپ وتىنەدى. بۇرىن ونداي جاعداي بولماعان. ەندى بۇگىننەن باستاپ جاعداي بار، سپورتتىق قابىرعامىز بار. ەندى سپورتشىلارىمىز ۇلكەن جەڭىستەرگە جەتەدى دەپ ويلايمىز»، – دەدى قۇزعا ورمەلەۋدەن قازاقستان جاستار قۇراماسىنىڭ اعا جاتتىقتىرۋشىسى سەرىك ەگىزبايەۆ.
ايتا كەتەيىك، ورتالىق ازيا چەمپيوناتى 24 شىلدەگە دەيىن جالعاسادى. ال جۇلدەلى ورىندارعا يە بولعان سپورتشىلار تامىز ايىندا اقش-تا وتەتىن جاستار اراسىنداعى الەم چەمپيوناتىنا جولداما الادى.