الماتىدا قۇرىلىسى اياقتالماعان كوپ قاباتتى ەكى ءۇي بۇزىلادى

ونىڭ ورنىنا سكۆەر سالىنۋى مۇمكىن. 

الماتىنىڭ «زەردەلى» شاعىناۋدانىندا قيسايىپ كەتكەن كوپ قاباتتى 7 ءۇيدى قايتا قالپىنا كەلتىرۋ جۇمىستارى جىل سوڭىنا دەيىن اياقتالادى. سونداي-اق سالىنىپ بىتپەگەن كوپ قاباتتى 2 ءۇي بۇزىلادى. بۇل تۋرالى قالا اكىمى ەربولات دوسايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«زەردەلى» شاعىناۋدانىندا پروبلەمالى 32 ءۇي بولعان. بۇگىنگى كۇنگە ىرگەتاسى نىعايتىلماعان كوپ قاباتتى 7 ءۇي قالعان ەدى. ولار جىل سوڭىنا دەيىن قايتا قالپىنا كەلتىرىلەدى»، - دەدى ەربولات دوسايەۆ الاتاۋ اۋدانى تۇرعىندارىمەن كەزدەسۋ بارىسىندا.

ايتۋىنشا، نىعايتۋ جۇمىستارى «قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتىنىڭ» جوبالىق شەشىمدەرىنە سايكەس قاتاڭ تۇردە ءجۇرىپ جاتىر.

«سونىمەن قاتار وسى اۋدانداعى قۇرىلىسى اياقتالماعان كوپ قاباتتى 2 ءۇيدى بۇزۋ تۋرالى «قازقسعزي» اق-نىڭ قورىتىندىسى بار. مەردىگەرمەن شارتقا قول قويىلدى، جىل سوڭىنا دەيىن بۇل ۇيلەر بۇزىلادى. وسى جەردە تۇرعىندار تالقىلاۋىنان كەيىن سكۆەر سالىنادى دەپ ويلايمىز»،- دەدى شاھار باسشىسى.