الماتىدا قۇرىلىس ساپاسىن ارتتىرۋ جانە تۇرعىنداردىڭ قۇقىقتارىن قورعاۋ بويىنشا جۇمىس كۇشەيىپ جاتىر.
بۇل تۋرالى قالا اكىمىنىڭ ورىنباسارى بەيبىت شاحانوۆ وڭىرلىك كوممۋنيكاسيالار قىزمەتىندە وتكەن بريفينگتە ايتتى، - دەپ حابارلايدى Aqshamnews.kz.
ونىڭ ايتۋىنشا، اكىمدىكتىڭ باستى مىندەتى – قۇرىلىس سالاسىندا ءتارتىپ ورناتۋ جانە زاڭ بۇزۋشىلىقتارعا جول بەرمەۋ. اسىرەسە ۇلەستىك قاتىسۋ ارقىلى تۇرعىن ءۇي سالۋ باعىتى ەرەكشە باقىلاۋدا.
«ءبىز قۇرىلىس كومپانيالارىنىڭ جۇمىسىن تۇراقتى تۇردە تەكسەرەمىز. قۇرىلىستىڭ ساپاسى، مەرزىمى جانە كەلىسىمشارت تالاپتارىنىڭ ورىندالۋى قاتاڭ باقىلانادى. ەگەر زاڭ بۇزىلسا، ەسكەرتۋ جاسايمىز، ايىپپۇل سالامىز نەمەسە قاجەت بولسا، جۇمىستى توقتاتامىز»، – دەدى قالا اكىمىنىڭ ورىنباسارى.
جوبا باستالار الدىندا بارلىق رۇقسات قۇجاتتارى مەن قارجىلىق كەپىلدىكتەر تەكسەرىلەدى. بۇل بولاشاق ۇلەسكەرلەردىڭ قاۋىپسىزدىگىن قامتاماسىز ەتەدى.
قالا اكىمدىگى تۇرعىندارعا سەنىمدى قۇرىلىس كومپانيالارىن تاڭداۋعا كومەكتەسۋ ءۇشىن اشىق اقپاراتتىق ءتىزىم جۇرگىزەدى جانە ونى ۇنەمى جاڭارتىپ وتىرادى.
مەملەكەتتىك تاپسىرىسپەن جۇمىس ىستەيتىن قۇرىلىسشىلاردىڭ دا جاۋاپكەرشىلىگى كۇشەيتىلدى.
«كەيبىر مەردىگەرلەر ءوز مىندەتتەرىن دۇرىس ورىندامايدى. سونىڭ كەسىرىنەن مەكتەپتەر مەن بالاباقشالاردىڭ قۇرىلىسى كەشىگەدى. ءبىز مۇنداي جاعدايلارعا جول بەرمەيمىز»، – دەدى سپيكەر.
بيىل ەكى كومپانيا – «سك 7 ستروي» ج ش س جانە «AsiaMax» ج ش س ليسەنزياسىنان ايىرىلدى. «سك MEGARON» ج ش س بويىنشا تەكسەرۋ جۇرگىزىلىپ جاتىر. سونداي-اق «قۇرىلىسشى-تبس» ج ش س ليسەنزياسىنىڭ ءبىر بولىگى توقتاتىلىپ، «الاتاۋ ساپا قۇرىلىس» ج ش س تەحنيكالىق قاداعالاۋ قۇقىعىنان ايىرىلدى.
بەيبىت شاحانوۆ اتاپ وتكەندەي، ماقسات – قۇرىلىس سالاسىندا ادىلدىك ورناتىپ، قالا تۇرعىندارىنىڭ مۇددەسىن قورعاۋ.