الماتى قالاسىندا تابيعاتتى قورعاۋ پوليسياسى بوستاندىق اۋدانى اكىمدىگىنىڭ قورشاعان ورتا جانە ەكولوگيا بولىمىمەن بىرلەسىپ، ەكولوگيالىق تالاپتاردى بۇزعان جانە اباتتاندىرۋ ەرەجەلەرىن ساقتاماعان قۇرىلىس نىسانىن انىقتادى.
قۇرىلىس الاڭىندا قوقىس قالدىقتارىنىڭ شامادان تىس جينالۋى جانە لاس قوقىستى رۇقساتسىز تاسىمالداۋ فاكتىلەرى تىركەلگەن. وسىعان بايلانىستى ۋچاسكە باسشىسى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 505-بابىنىڭ 1-بولىگىنە سايكەس اكىمشىلىك جاۋاپكەرشىلىككە تارتىلدى، دەپ حابارلايدى aqshamnews.kz Polisia.kz-كە سىلتەمە جاساپ.
بۇدان بولەك، بولاشاقتا وسىنداي زاڭ بۇزۋشىلىقتاردىڭ الدىن الۋ ءۇشىن ءتۇسىندىرۋ جۇمىستارى جۇرگىزىلدى. قالدىقتاردى وڭدەۋدەگى ەكولوگيالىق تالاپتاردىڭ بۇزىلۋى تۋرالى ماتەريال الماتى قالاسىنىڭ ەكولوگيا دەپارتامەنتىنە جولداندى.
الماتى قالاسى پوليسيا دەپارتامەنتى جەرگىلىكتى پوليسيا قىزمەتى باسقارماسى باستىعىنىڭ ورىنباسارى ايتان ەلەۋسىزوۆتىڭ ايتۋىنشا، «تازا قازاقستان» جالپىرەسپۋبليكالىق باعدارلاماسى مەن «الماتى – ورتاق ءۇيىمىز» قالالىق كامپانياسى اياسىندا قالانى اباتتاندىرۋ جانە ەكولوگيالىق تالاپتاردى ساقتاۋ شارالارى كۇشەيتىلگەن.
«جارقىن كۇز» شاراسى اياسىندا 16 قىركۇيەكتەن باستاپ قالادا اباتتاندىرۋ ەرەجەلەرى مەن سانيتارلىق نورمالاردى بۇزعان 2 757 دەرەك تىركەلسە، قوعامدىق ورىنداردى لاستاعانى ءۇشىن 2 232 حاتتاما تولتىرىلدى. ءىرى كولەمدەگى قالدىقتاردى، سىنعان جيھازداردى، تۇرمىستىق تەحنيكا مەن قۇرىلىس قالدىقتارىن جيناقتاعان 569 ازامات اكىمشىلىك جاۋاپكەرشىلىككە تارتىلدى.
الماتىنىڭ تابيعاتتى قورعاۋ پوليسياسى بارلىق ازاماتتاردى قورشاعان ورتاعا ۇقىپتىلىقپەن قاراۋعا جانە قالدىقتاردى شىعارۋ ەرەجەلەرىن قاتاڭ ساقتاۋعا شاقىرادى. سەبەبى تابيعاتتىڭ تازالىعى مەن دەنساۋلىعى ءاربىر ادامنىڭ سانالى ارەكەتىنە بايلانىستى.