2023 جىلعى 10 قازاننان باستاپ الماتى اكىمدىگىنىڭ قالادا ءتۇرلى قۇرىلىس-جوندەۋ جۇمىستارىن جۇرگىزۋ كەزىندە نوسەر كارىزىن رەتتەۋ قاجەتتىلىگى تۋرالى قاۋلىسى كۇشىنە ەندى، دەپ حابارلايدى Almaty-akshamy.kz
«قالالىق موبيلدىلىك، ەنەرگەتيكا جانە سۋمەن جابدىقتاۋ، ەكولوگيا جانە قورشاعان ورتا، جوسپارلاۋ جانە ۋربانيستيكا، قۇرىلىس باسقارمالارى مەن الماتى قالاسى اۋداندارى اكىمدەرىنىڭ اپپاراتتارى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن كوشە-جول جەلىسىن سالۋ، رەكونسترۋكسيالاۋ، كۇردەلى جانە ورتاشا جوندەۋ جونىندەگى جۇمىستاردى جۇرگىزۋ كەزىندە ينجەنەرلىك كوممۋنيكاسيالاردى سالۋدان، رەكونسترۋكسيالاۋدان جانە جوندەۋدەن كەيىن قالپىنا كەلتىرۋ جۇمىستارى كەزىندە نوسەر كارىزدەرىن رەتتەيتىن بولادى»، - دەلىنگەن قاۋلىدا.
سونداي - اق، قالا باسشىسى ينجەنەرلىك كوممۋنيكاسيالاردى سالعاننان، قايتا جاڭارتقاننان جانە جوندەگەننەن كەيىن جولدىڭ اسفالتبەتون جابىنىن قالپىنا كەلتىرۋ كەزىندە جول تاڭباسىنىڭ ءتيىستى جەلىلەرىن قولدانۋدى قاراستىرۋدى تاپسىردى.
الماتىداعى ارىق جەلىسىنىڭ ۇزىندىعى 1525 كم قۇرايدى، ونىڭ 1208 كم نوسەر كارىزى رەتىندە پايدالانىلادى. «الماتى قالاسىندا ارىق جەلىلەرى مەن نوسەر كارىزدەرىن سالۋ جانە رەكونسترۋكسيالاۋ» جوباسى اياسىندا 2024 جىلدىڭ سوڭىنا دەيىن 376 كم ارىق جەلىسىن سالۋ جوسپارلانۋدا، ونىڭ ىشىندە اعىمداعى جىلى 80،1 كم سالىندى.
ەسكە سالساق، بىرنەشە جىل بۇرىن الماتىدا كوللەكتورلىق-درەناج جۇيەسى ءىس جۇزىندە بولماعان، قالانىڭ اۋداندارىن جوسپارلاۋ كەزىندە بۇل ماسەلەگە بۇرىن ءتيىستى كوڭىل بولىنبەگەن. قولدا بار كوللەكتورلار ۇزاق جىلدار بويى يەسىز بولدى، ولاردى تۇنبادان تازارتۋ، اعىمداعى جوندەۋ، رەكونسترۋكسيالاۋ، ارىق جەلىلەرىن قوسۋ جۇمىستارى جۇرگىزىلمەدى. قولدانىستاعى ارىق جەلىسى بەكىتىلمەگەن، سۋ بۇرۋ كوللەكتورلارىمەن بايلانىسى جوق. بۇل جاڭبىر مەن ەرىگەن سۋدىڭ دۇرىس اعىپ كەتۋىنە كەدەرگى كەلتىرەدى جانە سۋ باسۋدىڭ نەگىزگى فاكتورىنا اينالادى.
قالادا سۋ باسۋ ماسەلەلەرىن شەشۋ ءۇشىن الماتى اكىمىنىڭ تاپسىرماسى بويىنشا جاڭا ارىق جەلىلەرىن سالۋدى جانە نوسەر جۇيەسىنىڭ كوللەكتورلارىن جوندەۋدى قامتيتىن كەشەندى شارالار قابىلدانۋدا.
نوسەر كارىزى نەمەسە جاڭبىر كارىزى دەپ اتالادى، بۇل جاڭبىر مەن ەرىگەن سۋدى قالا اۋماعىنان تىس جەرلەرگە اعىزىپ جىبەرۋگەن ارنالعان كۇردەلى ينجەنەرلىك جۇيە. جاڭبىر سۋىنا كوللەكتورلار، جاڭبىر ناۋالارى، ارنالار، سۋ قويمالارى جانە ت.ب. كىرەدى.