جىل باسىنان بەرى ەلىمىزدە 947 جەمقورلىققا قاتىستى قىلمىس تىركەلگەن.
مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعاليدى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
اسحات جۇماعالي:
جەمقورلىققا قارسى كۇرەسۋ ءۇشىن قابىلدانىپ جاتقان شارالار تۋرالى باياندادى:
– جىل باسىنان بەرى ەلىمىزدە 947 جەمقورلىققا قاتىستى قىلمىس تىركەلىپ، 660 ادام اشكەرەلەنگەن. ونىڭ 104ء-ى – ءارتۇرلى دەڭگەيدەگى باسشىلار؛
– تەرگەۋ امالدارى اياقتالعان قىلمىستىق ىستەر اياسىندا 193،5 ميلليارد تەڭگە وتەلگەن. جالپى، 2022 جىلدان بەرى مەملەكەتكە جانە كۆازيمەملەكەتتىك سەكتور سۋبەكتىلەرىنە 1،03 تريلليون تەڭگە كولەمىندە مۇلىكتىك اكتيۆتەر مەن قارجى قايتارىلعان؛
– بيىل ءبىلىم، عىلىم، سپورت، دارى-دارمەك ساتىپ الۋ، قۇرىلىس، جەر تەلىمدەرىن ءبولۋ سالالارىنا جۇرگىزىلگەن تالداۋ جانە مونيتورينگ جۇمىستارىنىڭ قورىتىندىسى بويىنشا 113 ەسەپ ازىرلەنگەن؛
– مەملەكەتتىك ورگاندارعا جەمقورلىق تاۋەكەلدەرىن جويۋعا باعىتتالعان مىڭنان استام ۇسىنىس بەرىلگەن؛
– الدىن الۋ شارالارى اياسىندا، سونىڭ ىشىندە «ءبىرىڭعاي ساتىپ الۋ تەرەزەسى» پورتالىنا مونيتورينگ جۇرگىزۋ ارقىلى 31 ميلليارد تەڭگەدەن استام بيۋدجەت قاراجاتىنىڭ ءتيىمسىز جۇمسالۋىنا جول بەرىلمەگەن؛
– «بيزنەسكە جول» جوباسىن جۇزەگە اسىرۋ كەزىندە 7،5 مىڭعا جۋىق كاسىپكەردىڭ قۇقىعى قورعالىپ، 67 تۇيتكىلدى كەيس شەشىمىن تاپقان؛
جول سالاسىنداعى جەمقورلىق ارەكەتتەردى جويۋعا قاتىستى تاپسىرماسىنىڭ ورىندالۋ بارىسى جونىندە باياندادى:
– «اقشانى بوياۋ» پيلوتتىق جوباسىن الەۋمەتتىك ماڭىزى بار سالالاردا، سونىڭ ىشىندە جول قۇرىلىسىندا ىسكە اسىرۋ جوسپارلانىپ وتىر؛
جىل باسىنان بەرى قاتار، گونكونگ، ازەربايجان جانە رەسەي فەدەراسياسىنىڭ سىبايلاس جەمقورلىققا قارسى ۆەدومستۆولارىمەن ىنتىماقتاستىق تۋرالى 4 مەموراندۋمعا قول قويىلعانى جايىندا مالىمەت بەردى. اتالعان قۇجاتتار قۇقىقتىق كومەك كورسەتۋ، اكتيۆتەردى قايتارۋ، ادامداردى ىزدەستىرۋ، بيۋدجەت قاراجاتىنىڭ ماقساتتى جۇمسالۋىنا جانە ساتىپ الۋ ۇدەرىسىنە مونيتورينگ جۇرگىزۋ ماسەلەلەرى بويىنشا سەرىكتەستىكتى نىعايتۋعا باعىتتالعان.
كەزدەسۋ سوڭىندا قاسىم-جومارت توقايەۆ ءبىرقاتار ناقتى تاپسىرما بەردى.