مەكەمە باسشىلىعى قۇقىق قورعاۋشىلاردىڭ ناتيجەلى جۇمىس ىستەۋىنە قولايلى جاعداي جاساۋدا.
قۇقىق قورعاۋشىلار قاڭتار وقيعاسىنا قاتىستى قامالعاندارمەن كەزدەستى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
قاڭتار وقيعاسى كەزىندەگى جاپپاي تارتىپسىزدىكتەردەن كەيىن الماتى قالاسى بويىنشا قاجد-عا قاراستى تەرگەۋ يزولياتورىنا جەتكىزىلگەندەر سانى كۇرت وسكەنى بەلگىلى. وسىعان وراي اتالعان مەكەمەگە قۇقىق قورعاۋشىلاردىڭ كەلىپ، كۇدىكتىلەردەن جاۋاپ الۋى جانە ادام قۇقىعىن قورعاۋ جونىندەگى قوعامدىق ۇيىم وكىلدەرىنىڭ كۇدىكتىلەردى ۇستاۋ جاعدايىن قاداعالاۋى جيىلەدى. وسىعان وراي قاج دەپارتامەنتى مەن مەكەمە باسشىلىعى قۇقىق قورعاۋشىلاردىڭ ناتيجەلى جۇمىس ىستەۋىنە قولايلى جاعداي جاساۋدا.
اتاپ ايتقاندا، الماتى قالاسى بويىنشا قاج دەپارتامەنتىنىڭ لا-155/18 مەكەمەسىنە قازاقستان رەسپۋبليكاسىنداعى ادام قۇقىقتارى جونىندەگى ۋاكىل ەلۆيرا ازيموۆا، «ادام قۇقىعىنا ارنالعان حارتيا» قوعامدىق قورىنىڭ ديرەكتورى جەمىس تۇرماعامبەتوۆا كەلىپ، ۇستالعاندارمەن جان-جاقتى اڭگىمە وتكىزدى. تەرگەۋ يزولياتورىنا جەتكىزىلگەندەردىڭ اراسىندا كامەلەتتىك جاسقا تولماعان ءجاسوسپىرىمنىڭ بولۋىنا وراي قازاقستان رەسپۋبليكاسىنداعى بالا قۇقىقتارى جونىندەگى ۋاكىل ارۋجان سايننىڭ نۇسقاۋىمەن ءجاسوسپىرىمنىڭ جاعدايىن بىلۋگە قۇرامىندا قازاقستاننىڭ ازاپتاۋعا قارسى ۇكىمەتتىك ەمەس ۇيىمدار كواليسياسىنىڭ ۇيلەستىرۋشىسى، ادام قۇقىقتارى جانە زاڭدىلىقتى ساقتاۋ جونىندەگى قازاقستان حالىقارالىق بيۋروسى ديرەكتورىنىڭ ورىنباسارى، ق ر ادام قۇقىقتارى جونىندەگى ۋاكىل جانىنداعى ازاپتاۋدىڭ الدىن الۋ ۇات ۇيلەستىرۋ كەڭەسىنىڭ مۇشەسى روزا اقىلبەكوۆا، ۇات مۇشەسى، پەدياتريا جانە بالالار حيرۋرگياسى عىلىمي ورتالىعىنىڭ انەستەزيولوگ-رەانيماتولوگ دارىگەرى گۇلجان تەيپ قىزى جانە «قازاقستانداعى داعدارىس ورتالىقتارى وداعىنىڭ» ءتوراعاسى، ق ر ادام قۇقىقتارى جونىندەگى ۋاكىل جانىنداعى ازاپتاۋعا قارسى ۇات ۇيلەستىرۋ كەڭەسىنىڭ مۇشەسى زۋلفيا بايساقوۆا بار ساراپشىلار توبى كەلىپ، تەرگەۋ قاماۋىنداعى ءجاسوسپىرىمدى ۇستاۋ جاعدايىمەن تانىستى.
سونداي-اق، لا-155/18 مەكەمەسىندەگى تەرگەۋ قاماۋىنداعىلاردىڭ جاعدايى قوعامدىق باقىلاۋ كوميسسياسى وكىلدەرىنىڭ دە ءجىتى نازارىندا. مەكەمەگە الماتى قالاسى جانە الماتى وبلىسى بويىنشا قوعامدىق باقىلاۋ كوميسسياسىنىڭ ءتورايىمى ارداق ءجانابىلوۆا كەلىپ، تۇتقىندارمەن بەتپە-بەت اڭگىمەلەستى. قۇقىق قورعاۋشىلار تەرگەۋ يزولياتورىنىڭ مەديسينا-سانيتارلىق بولىمىندە ەم الىپ جاتقان جارالى كۇدىكتىلەرمەن دە كەزدەستى.
بۇگىندە قاڭتارداعى قاقتىعىس كەزىندە قاماۋعا الىنعاندارعا كومەكتەسۋ ماقساتىندا قۇرىلعان «امانات» قورىنىڭ وكىلدەرى مەن قۇرامىندا بەلگىلى قۇقىق قورعاۋشىلار، قىلمىستىق ءىس جۇرگىزۋ قۇقىعى بويىنشا ماماندانعان زاڭگەرلەر بار تاۋەلسىز كوميسسيا مۇشەلەرى تەرگەۋ يزولياتورىنا قامالعان كۇدىكتىلەرگە جان-جاقتى قۇقىقتىق كومەك كورسەتۋدە.