جاز باسىندا الماتىدا ناۋرىزباي اۋدانىنداعى يننوۆاسيالىق شىعارماشىلىق ورتالىعى اشىلدى. الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا رسك بريفينگىندە سويلەگەن سوزىندە ورتالىقتىڭ جوبالىق قۋاتتىلىعى اپتاسىنا 5000 ورىن دەپ اتاپ ءوتتى، دەپ حابارلايدى Almaty-akshamy.kz.
وقۋ جىلى باستالعانعا دەيىن وسىعان ۇقساس اپتاسىنا 5000 بالانى قامتيتىن ورتالىقتىڭ اشىلۋى الاتاۋ اۋدانىندا دا جوسپارلانعان.
“بۇل قالا اكىمدىگىنىڭ ءبىزدىڭ بالالارعا دەگەن ۇلكەن نازارى بولىپ تابىلاتىن بىرەگەي جوبا. الداعى ۋاقىتتا ءبىز بۇل ورتالىقتىڭ مۇمكىندىكتەرىن پايدالانىپ، قالامىزدىڭ قوسىمشا ءبىلىم سالاسىنداعى ەڭ ۇزدىك مامانداردى بارىنشا تارتىپ، كرەاتيۆتى يدەيالار الاڭىنا اينالدىرۋىمىز كەرەك”، - دەپ ءبولىستى ل.جىلقىبايەۆا.
سونىمەن قاتار، قادامدىق قولجەتىمدىلىكتى قامتاماسىز ەتۋ شەڭبەرىندە 30-شى جىلدارى تۇركسىب جانە بوستاندىق اۋداندارىندا سالىنعان ەكى وقۋشىلار ءۇيىن بۇزۋ جانە ولاردىڭ ورنىنا كۇنىنە 800 كەلۋشىگە دەيىن قۋاتى بار زاماناۋي دامۋ جانە شىعارماشىلىق ورتالىقتارىن سالۋ جوسپارلانۋدا. بۇگىنگى تاڭدا جوبالار دايىن، قۇرىلىس-مونتاج جۇمىستارى 2024 جىلى باستالادى.
2025 جىلعا دەيىن قاجەتتىلىك بار اۋدانداردا حالىقارالىق ستاندارتتارعا سايكەس كەلەتىن قوسىمشا ءبىلىم بەرۋدىڭ تاعى 3 زاماناۋي ورتالىعىن سالۋ جوسپارلانىپ وتىر.
“جالپى، 2025 جىلدىڭ سوڭىنا قاراي قابىلدانىپ جاتقان شارالار ەسەبىنەن تەگىن قوسىمشا بىلىممەن قامتۋدىڭ ءوسۋى 25% - عا دەيىن ۇلعايتىلاتىن بولادى. وسىلايشا، ءبىز تەگىن ۇيىرمەلەرگە قاتىساتىن بالالاردىڭ سانىن 60 000-عا دەيىن ارتتىرۋدى جوسپارلاپ وتىرمىز. اكىمدىكتىڭ قولداۋىمەن ءبىز تەحنيكالىق جانە كاسىپتىك ءبىلىمى بار كادرلاردى دايارلاۋعا ۇلكەن باسىمدىق بەرەمىز”، - دەپ اتاپ ءوتتى سپيكەر.