الماتىنىڭ 182 مەكتەبىندە ينكليۋزيۆتى ءبىلىم بەرۋ جۇزەگە اسىرىلۋدا.
الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆانىڭ ايتۋىنشا، ەرەكشە ءبىلىم بەرۋ قاجەتتىلىكتەرى بار بالالاردى قامتۋ جىل سايىن ارتىپ كەلەدى، دەپ حابارلايدى Almaty-akshamy.kz
“الماتى قالاسىندا ينكليۋزيۆتى ءبىلىم بەرۋدى جۇزەگە اسىراتىن مەكتەپتەر سانى جىل سايىن ارتىپ كەلەدى. قازىرگى ۋاقىتتا قالادا 182 مەكتەپتە ەرەكشە ءبىلىم بەرۋ قاجەتتىلىگى بار بالالارعا جاعداي جاسالعان (85%). 2023-2024 وقۋ جىلىنىڭ باسىندا قوسىمشا 16 مەكتەپتە ينكليۋزيۆتى ءبىلىم بەرۋدى ىسكە اسىرۋ جوسپارلانۋدا (198 مەكتەپ، بۇل مەكتەپتەردىڭ جالپى سانىنىڭ 92% قۇرايدى)”، - دەپ حابارلادى باسقارما باسشىسى.
سپيكەردىڭ ايتۋىنشا، ەگەر 2020-2021 وقۋ جىلىندا ينكليۋزيۆتى ءبىلىم بەرۋمەن 3 672 بالا قامتىلسا، 2022-2023 وقۋ جىلىندا 4 632 بالا قامتىلعان.
“قالانىڭ 185 مەكتەبىندە ەرەكشە ءبىلىم بەرۋ قاجەتتىلىكتەرى بار بالالاردى قولداۋ بويىنشا كابينەتتەر جۇمىس ىستەيدى، ولاردىڭ 8ء-ى اۋدانداردىڭ تىرەك مەكتەپتەرى بولىپ تابىلادى (№82، 75، 116، 63، 87، 64، 174، 74)، جانە ەرەكشە ءبىلىم بەرۋ قاجەتتىلىكتەرى بار بالالارمەن جۇمىس ىستەيتىن مۇعالىمدەرگە ادىستەمەلىك كومەك كورسەتەدى”، - دەدى ول.
سونىمەن قاتار، ءبىلىم بەرۋدەگى جاڭا تەحنولوگيالاردىڭ قالالىق عىلىمي–ادىستەمەلىك ورتالىعىنىڭ بازاسىندا ينكليۋزيۆتى رەسۋرستىق ورتالىق (يرو) اشىلدى. سونداي-اق، ينكليۋزيۆتى ءبىلىم بەرۋدى ىسكە اسىراتىن جالپى ءبىلىم بەرەتىن مەكتەپتەردىڭ 600 پەداگوگىنىڭ بىلىكتىلىگىن ارتتىرۋ كۋرستارىن وتكىزۋ جوسپارلانۋدا.
“قازىرگى ۋاقىتتا مۇمكىندىگى شەكتەۋلى بالالارعا ارنايى پسيحولوگيالىق-پەداگوگيكالىق قولداۋ كورسەتەتىن جەكە ۇيىمداردا مەملەكەتتىك ءبىلىم بەرۋ تاپسىرىسىن ورنالاستىرۋعا كونكۋرس جاريالاندى”، - دەپ اتاپ ءوتتى ءسوز سوڭىندا سپيكەر.