الماتىدا “قورعاۋ – ءقاۋىپتى جۇرگىزۋشى” جۇيەسى ارقىلى كولىك ۇرىسى انىقتالدى

قاسكويدىڭ ولجاسى جاڭا كروسسوۆەر بولدى.

ۇرى ەركىن كىرۋ مۇمكىندىگىن پايدالانىپ، باسقا بىرەۋدىڭ پاتەرىنەن كولىك كىلتىن ۇرلاپ كەتكەن، دەپ حابارلايدى Almaty-akshamy.kz Polisia.kz-كە سىلتەمە جاساپ.

«كىلتتەر ۇيدە بولدى. ۇرى تاڭعى ساعات 06.30-دا كىرىپ، كىلتتەردى ۇرلاپ كەتكەن. ەكى ساعاتتىڭ ىشىندە ماعان كولىكتى تاۋىپ، قايتارىپ بەردى. مەن وتە قۋانىشتىمىن. ۇلكەن راقمەت. كۇتپەدىم»، – دەيدى "دارابوز" شاعىناۋدانىنىڭ تۇرعىنى. 

Hyundai اۆتوكولىگىنىڭ ۇرلانعانى تۋرالى حابارلاما كەلىپ تۇسكەننەن كەيىن جەدەل باسقارۋ ورتالىعىنىڭ وپەراتورلارى ونى “قورعاۋ – ءقاۋىپتى جۇرگىزۋشى” اۆتوماتتاندىرىلعان جۇيەسى ارقىلى تاپتى. سولتۇستىك اينالما جولىندا كولىك كامەراعا ءتۇسىپ قالعان. ول شىعىس باعىتتا قوزعالىپ كەلە جاتتى.

«بۋران-179» پاترۋلدىك پوليسياسىنىڭ ەكيپاجى پوستىشيەۆا كوشەسىنىڭ قيىلىسىندا كولىكتىڭ جولىن جاپتى. ۇرى ۇستالدى»، – دەدى الاتاۋ اۋداندىق پب-نا قاراستى پوليسيا ءبولىمىنىڭ باستىعى قۇماربەك كەنشىنبايەۆ.

ۇستالعان ازامات ماس بولعانىن العا تارتىپ، كىناسىن مويىندادى. ەر ادامنىڭ ايتۋىنشا، ول دوسىنىڭ ءۇيىن ىزدەۋگە كەلگەن، ءبىراق باسقا بىرەۋدىڭ پاتەرىنە كىرىپ كەتىپ، سول جەردەن كولىك كىلتىن ۇرلاپ كەتكەن.