تۋۋ تۋرالى كۋالىكتەردىڭ تەلنۇسقالارى، قوسارلانعان اتتار مەن اكەسىنىڭ اتىن بەرۋ
وڭىرلىك كوممۋنيكاسيالار قىزمەتىندە وتكەن بريفينگتە الماتى قالالىق ادىلەت دەپارتامەنتى باسشىسىنىڭ ورىنباسارى زاۋرەش ساتحوجينا ازاماتتارعا ىڭعايلى بولۋ ءۇشىن ازاماتتىق حال اكتىلەرىن تىركەۋدىڭ، قايتالاما كۋالىك بەرۋدىڭ بارلىق تۇرلەرىنە ەكستەرريتوريالىق پرينسيپ ەنگىزىلگەنىن ايتتى دەپ حابارلايدى almaty-akshamy.kz الماتى قالاسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.
باسقاشا ايتقاندا، قاي وڭىردە تۋىلعانىنا قاراماستان تۋۋ تۋرالى قايتالاما كۋالىكتى الۋ قاجەت بولعان جاعدايدا، تۋۋ تۋرالى قايتالاما كۋالىكتى ول قالاۋى بويىنشا كەز كەلگەن تىركەۋشى ورگاننان الا الادى.
سونىمەن قاتار، اتا-انالاردىڭ تاڭداۋى بويىنشا بالانىڭ تۋۋىن تىركەۋ پرواكتيۆتى تاسىلمەن، SMS-حابارلامالار ارقىلى كورسەتىلەتىن بولادى.
«انانىڭ جەكە باسىن كۋالاندىراتىن قۇجاتتارى بولماعان جاعدايدا بالانىڭ تۋۋىن تىركەۋ جانە تۋۋ تۋرالى كۋالىك بەرۋ مۇمكىندىگى قاراستىرىلعان. وسىلايشا، بالالاردىڭ تۋعاننان باستاپ ازاماتتىعى جوق بولۋ ماسەلەسى شەشىلۋدە»، - دەپ حابارلادى وكق سپيكەرى.
سونداي-اق، زاۋرەش ءساتحوجينا وزگەرىستەر قوس ەسىم مەن اكەسىنىڭ اتىن دەفيس ارقىلى بەرۋدى قاراستىراتىنىن ايتتى.
«ماسەلەن، اكەسىنىڭ اتى ءالي-اسقار بولسا، اكەسىنىڭ اتى الي-اسكاروۆيچ نەمەسە ءالي-اسقارۇلىنا بەرىلۋى مۇمكىن»، - دەدى ادىلەت دەپارتامەنتى باسشىسىنىڭ ورىنباسارى.
كۋالىكتەرى قازاقستان رەسپۋبليكاسىنان تىسقارى جەرلەردە بەرىلگەن بالالاردىڭ تۋۋىن تىركەۋ ءۇشىن قۇجاتتار تىزبەسى كەڭەيتىلدى. مىسالى، ەگەر بالا وزبەكستاندا تۋىلسا جانە تۋۋ تۋرالى كۋالىك تۋعان جەرى بويىنشا بەرىلسە، جاڭا تۇزەتۋلەرگە سايكەس، اتا-انالار بالانىڭ ناقتى تۋعان جەرىن كورسەتە وتىرىپ، كەز كەلگەن تىركەۋشى ورگاندا قازاقستاندىق ۇلگىدەگى تۋۋ تۋرالى كۋالىكتى الا الادى.
بۇل نوۆەللا اتا-انالارعا مەكتەپكە دەيىنگى بالالار مەكەمەلەرىنە كەزەككە قويۋ، مەديسينالىق ۇيىمدارعا بەكىتۋ، اتاۋلى الەۋمەتتىك كومەك تاعايىنداۋ، بورىش جۇكتەمەسىن ازايتۋ جانە ت.ب. سياقتى مەملەكەتتىك قىزمەتتەردى ەلەكتروندىق تۇردە الۋعا مۇمكىندىك بەرەدى.
ازاماتتىق حال اكتىلەرىن تىركەۋدىڭ كەيبىر تۇرلەرى اۆتوماتتاندىرۋعا بايلانىستى الىنىپ تاستالدى. 2 انىقتامانىڭ ورنىنا: بالا اسىراپ الۋ تۋرالى كۋالىك نەمەسە اكە بولۋ جانە تۋۋ تۋرالى كۋالىك، تىركەۋشى ورگان بالانىڭ جەكە دەرەكتەرى مەن اتا-اناسى تۋرالى مالىمەتتەردى قامتيتىن ءبىر عانا بالانىڭ تۋۋ تۋرالى كۋالىگىن بەرەدى.
سوت شەشىمى نەگىزىندە نەكەنى بۇزۋدى تىركەۋ ءتارتىبى اۆتوماتتاندىرىلدى. بۇل اقپارات ادىلەت مينيسترلىگىنىڭ اقپاراتتىق جۇيەسىنە اۆتوماتتى تۇردە ەنگىزىلىپ، نەكە قيۋ تۋرالى جازباعا ونىڭ بۇزىلعانى تۋرالى بەلگى قويىلادى.
ازاماتتاردىڭ تىركەۋشى ورگان مەملەكەتتىك ورگانداردىڭ اقپاراتتىق جۇيەلەرىنەن الا الاتىن قۇجاتتاردى (سوت شەشىمى، مەديسينالىق انىقتاما، قازاقستان رەسپۋبليكاسىندا تىركەلگەن اكت جازبالارى تۋرالى مالىمەتتەر جانە ت.ب.) ۇسىنۋ قاجەتتىلىگى جويىلدى.
جوعارىدا اتالعان بارلىق جاڭالىقتار ازاماتتاردىڭ ۋاقىتىن جانە قارجىلىق شىعىندارىن قىسقارتۋعا، سونداي-اق مەملەكەتتىك قىزمەتتەردى كورسەتۋ ۇدەرىسىن سيفرلاندىرۋعا مۇمكىندىك بەرەدى.