بۇل شارا اۋەزوۆتىڭ 125 جىلدىعىنا ورايلاستىرىلعان.
اباي وبلىسىندا مۇحتار اۋەزوۆتىڭ 125 جىلدىعىنا وراي «ەڭلىك – كەبەك» ەسكەرتكىشى اشىلادى، دەپ حابارلايدى Almaty-akshamy.kz وبلىس اكىمدىگىنىڭ باسپا ءسوز قىزمەتىنە سىلتەمە جاساپ.
28 قىركۇيەكتە زاڭعار جازۋشى مۇحتار اۋەزوۆتىڭ تۋعانىنا 125 جىل تولادى. قازاق قارا ءسوزىنىڭ حاس شەبەرىنىڭ قۇرمەتىنە اباي وبلىسىندا ءبىرقاتار شارا وتكىزىلەدى دەپ جوسپارلانۋدا. سونىڭ ءبىرى – اباي اۋدانىنداعى «ەڭلىك – كەبەك» ەسكەرتكىشىنىڭ اشىلۋى.
«مۇحتار اۋەزوۆتىڭ 125 جىلدىعى اياسىندا وبلىس اكىمى نۇرلان ۇرانحايەۆتىڭ تاپسىرماسىنا سايكەس، اباي اۋدانىنىڭ اۋماعىندا ورنالاسقان «ەڭلىك – كەبەك» كەسەنەسىنە جوندەۋ جۇمىستارى جۇرگىزىلۋدە. جۇمىستار تامىز ايىنىڭ اياعىندا باستالدى. سونىمەن قاتار قوس عاشىققا ارنالعان ەسكەرتكىش ورناتىلادى. جۇمىستار وسى جىلدىڭ قىركۇيەك ايىنىڭ سوڭىندا اياقتالادى»، - دەلىنگەن وبلىس اكىمدىگىنىڭ باسپا ءسوز قىزمەتى تاراتقان اقپاراتتا.