الماتىدا وڭىرلىك عىلىمدى دامىتۋعا باعىتتالعان گرانتتار بايقاۋىن ىسكە اسىرۋ جوسپارلانىپ وتىر.
گرانتتاردىڭ جالپى كولەمى - 348 ملن تەڭگە، - دەپ حابارلايدى aqshamnews.kz.
بۇل تۋرالى الماتى قالاسى اكىمىنىڭ ورىنباسارى ابزال نۇكەنوۆتىڭ الماتىنىڭ دامۋىنا جانە قالاداعى مىندەتتەردى شەشۋگە ارنالعان ديسسەرتاسيالىق جۇمىستار مەن عىلىمي-زەرتتەۋ جوبالارىن قورعاعان اۆتورلارمەن وتكەن ستراتەگيالىق كەزدەسۋ بارىسىندا ايتىلدى.
كەزدەسۋ فورسايت-سەسسيا فورماتىندا ءوتىپ، عىلىمي ازىرلەمەلەردى مەگاپوليستى دامىتۋدا تاجىريبەلىك تۇرعىدا قولدانۋعا ارنالدى. سونداي-اق، عىلىمي قاۋىمداستىق وكىلدەرىمەن مۇنداي كەزدەسۋلەر الداعى ۋاقىتتا تۇراقتى تۇردە وتەتىنى اتاپ ءوتىلدى.
تالقىلاۋ بارىسىندا قاتىسۋشىلار اتموسفەرالىق اۋا ساپاسىن جاقسارتۋعا، كولىك جۇيەسىن دامىتۋعا، سونداي-اق ماياتنيكتىك كوشى-قوننىڭ تەرىس اسەرىن تومەندەتۋگە باعىتتالعان جوباسىن ۇسىندى. اتالعان باعىتتار قالانىڭ تۇراقتى دامۋى مەن تۇرعىنداردىڭ تۇرمىس ساپاسىن ارتتىرۋدىڭ باستى باسىمدىقتارى رەتىندە بەلگىلەندى.
ءوز كەزەگىندە ابزال نۇكەنوۆ قولداۋ بايقاۋ نەگىزىندە تەك قولدانبالى سيپاتتا، قالالىق ينفراقۇرىلىم مەن باسقارۋ ۇدەرىستەرىنە ناقتى ەنگىزۋگە باعىتتالعان عىلىمي جوبالارعا كورسەتىلەتىنىن ايتتى.
كەزدەسۋ الماتى قالاسى اكىمدىگى جانىنداعى عىلىم جانە تەحنولوگيالار كەڭەسىنىڭ قىزمەتى اياسىندا ءوتتى. كەڭەس 2025 جىلى عىلىمي الەۋەتتى قالالىق ساياساتقا جۇيەلى تۇردە بىرىكتىرۋ ماقساتىندا قۇرىلعان. عىلىمي گرانتتار بايقاۋىن وتكىزۋ مەگاپوليستىڭ الەۋمەتتىك-ەكونوميكالىق دامۋىنا تىكەلەي بايلانىستى زەرتتەۋلەردى قولداۋدىڭ تاجىريبەلىك تەتىكتەرىنىڭ ءبىرى رەتىندە قاراستىرىلىپ وتىر.