الماتىدا قول كۇرەس سپورتىنان الەم چەمپيوناتى باستالدى

الماتى قالاسىنداعى Sadu Arena سپورت كەشەنىندە قول كۇرەسىنەن ەرەسەكتەر، كادەتتەر، جاستار مەن جاسوسپىرىمدەر اراسىندا 44ء-شى الەم چەمپيوناتى باستالدى. 

بۇل تۋرالى سپورتتى دامىتۋ ديرەكسياسىنىڭ باسپا ءسوز قىزمەتى مالىمدەدى، دەپ حابارلايدى Almaty-akshamy.kz.

الەم چەمپيوناتىنىڭ اشىلۋ راسىمىنە سپورتتى دامىتۋ ديرەكسياسى ديرەكتورىنىڭ ورىنباسارى الىشەر ايمۇحامبەتوۆ ارنايى كەلىپ قاتىستى.

«مۇنداي بەدەلدى جارىستار ءبىزدىڭ ەلىمىزدە قول كۇرەستى ناسيحاتتاۋعا كۇشتى سەرپىن بەرەتىنى ءسوزسىز. قازاقستاندىق سپورتشىلاردىڭ حالىقارالىق جارىستاردا جوعارى ناتيجەلەرگە قول جەتكىزگەن جەتىستىكتەرى وسكەلەڭ ۇرپاقتى سپورتپەن اينالىسۋعا، ۇلكەن ماقساتتار قويۋعا، وعان قول جەتكىزۋگە شابىتتاندىرادى. بارلىعىڭىزعا ساتتىلىك تىلەيمىن»، - دەدى الىشەر ايمۇحامبەتوۆ.

الەمنىڭ 50 ەلىنەن ءار ءتۇرلى سالماقتاعى 1000-نان استام قول كۇرەس شەبەرلەرى جينالعان بايراقتى باسەكەدە ەلىمىزدىڭ نامىسىن 178 سپورتشى قورعايدى.

مادەنيەت جانە سپورت مينيسترلىگى، گىر سپورتى جانە قول كۇرەس فەدەراسياسىنىڭ قولداۋىمەن ءوتىپ جاتقان چەمپيونات 3 قىركۇيەككە دەيىن جالعاسادى.