زەرتحانا الماتى قالاسىن سيفرلاندىرۋ جانە پروسەستەردى اۆتوماتتاندىرۋ سالاسىن جەتىلدىرۋگە ارنالعان.
قازاقستان-بريتان تەحنيكالىق ۋنيۆەرسيتەتىندە الماتىنىڭ سيفرلاندىرۋ باسقارماسىمەن جانە IGLUS حالىقارالىق شۆەيساريالىق ۇيىمىمەن بىرلەسىپ SMART CITY Lab زەرتحاناسىنىڭ اشىلۋ ءراسىمى ءوتتى، دەپ حابارلايدى Almaty-akshamy.kz
«قازىرگى ۋاقىتتا قالالاردىڭ دامۋى قولدانبالى تاجىريبەگە جانە جەكەلەگەن باعىتتاردىڭ ءبىلىم بازاسىنا بايلانىستى. اقىلدى قالالاردى باسقارۋ ءادىسناماسىنا نەگىزدەلگەن بۇل جوبا اقپارات پەن قۇزىرەتتىلىكتى ءبىر جەردە جيناۋ مەن تالداۋدى ورتالىقتاندىرۋعا مۇمكىندىك بەرەدى. الماتى الەمدىك وزىق تاجىريبەگە تۇراقتى قولجەتكىزە الادى جانە ينفراقۇرىلىمى دامىعان زاماناۋي قالا رەتىندە داميتىن بولادى»، – دەپ مالىمدەدى الماتى قالاسى اكىمىنىڭ ورىنباسارى الىشەر ءابدىقادىروۆ.
مامانداردىڭ پىكىرىنشە، «اقىلدى» قالالىق زەرتحانا پراكتيكالىق شەشىمدەردىڭ كوزى بولىپ تابىلادى.
«ءبىز ادامدارعا جۇيەلى تۇسىنىك الۋعا كومەكتەسەمىز، ويتكەنى قالالار كۇردەلى جۇيەلەر. ءبىز، سايىپ كەلگەندە، قالا تۇرعىندارىنىڭ وسى ءتاسىلدى ناقتى سەزىنۋىن قالايمىز. كوپشىلىك قولدانا الاتىن عالامدىق جەلىنىڭ اسپەكتىلەرىنە توقتالامىز»، – دەدى لوزاننا فەدەرالدى پوليتەحنيكالىق مەكتەبىنىڭ پروفەسسورى ماتتياس فينگەر.
جوبا قالالىق جۇيەلەردىڭ تيىمدىلىگىن باعالاۋعا جانە تالداۋعا، ينفراقۇرىلىمدى دامىتۋعا جانە Smart City ي Smart Systems ماگيستراتۋراسى مەن زياتكەرلىك جۇيەلەردىڭ ءبىلىم بەرۋ باعدارلامالارى بويىنشا كادرلاردىڭ بىلىكتىلىگىن ارتتىرۋعا مۇمكىندىك بەرەدى.
«بۇل قازاقستان مەن ورتالىق ازيا اۋماعىنداعى وسىنداي العاشقى زەرتحانا جانە ءبىز ونى الماتىداعى قبتۋ-دا اشۋدى ماقتان تۇتامىز. ءبىز سەرىكتەستەرىمىزبەن بىرگە وسى زەرتحانانىڭ مىندەتتەرى مەن ماقساتتارىن ىسكە اسىرىپ، جاڭا مامانداردى، ماگيسترانتتار مەن دوكتورانتتاردى وقىتىپ، قالا تۇرعىندارىنىڭ ءومىر ءسۇرۋ ساپاسىن جاقسارتۋعا ىقپال ەتىپ، سۇيىكتى قالامىزدىڭ ينفراقۇرىلىمىن جاڭعىرتۋ ءۇشىن جاڭا شەشىمدەر ەنگىزەتىن بولامىز»، – دەپ اتاپ ءوتتى قبتۋ رەكتورى ماراتبەك عابدۋللين.
بولاشاقتا قبتۋ بازاسىندا سيفرلاندىرۋ باسقارماسىنىڭ بولىمشەسىن اشۋ جوسپارلانۋدا، بۇل قىزمەتكەرلەرگە IT سالاسىندا ماگيسترانتتار مەن دوكتورانتتارمەن بىرلەسىپ جوبالاردى ازىرلەۋگە مۇمكىندىك بەرەدى.
انىقتاما: IGLUS – بۇل لوزانناداعى شۆەيساريا فەدەرالدى تەحنولوگيالىق ينستيتۋت قۇرعان عىلىمي-زەرتتەۋ باعدارلاماسى: لوزاننا فەدەرالدى پوليتەحنيكالىق مەكتەبى (EPFL) 2011 جىلى ءىرى، كۇردەلى جانە ديناميكالىق قالالىق جۇيەلەردى باسقارۋدى جاقسارتۋعا باعىتتالعان.