الماتىدا «قازاقستاندىقتار» ۇيىمداسقان قىلمىستىق توبىنىڭ جەتەكشىلەرى ۇستالدى

ق ر ۇلتتىق قاۋىپسىزدىك كوميتەتى ىىم-مەن بىرلەسىپ «قازاقستاندىقتار» ۇيىمداسقان قىلمىستىق توبىنىڭ (ۇقت) جەتەكشىلەرىن ۇستادى

ۇقك ىىم-مەن بىرلەسىپ، الماتى قالاسىندا جانە الماتى وبلىسىندا بۇرىنعى سپورتشىلار مەن بۇرىن سوتتالعان ادامداردان تۇراتىن «قازاقستاندىقتار» ۇقت-نىڭ قۇقىققا قايشى ارەكەتىنىڭ جولىن كەسۋ بويىنشا ءىرى اۋقىمدى ارنايى وپەراسيا جۇرگىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

توپتىڭ ۇستالعان التى مۇشەسىنىڭ الماتى ءوڭىرى اۋماعىنداعى كوپتەگەن قىلمىستارعا (قورقىتىپ تارتىپ الۋ، قاراقشىلىق، وزبىرلىق، بۇزاقىلىق، كاسىپكەرلەرگە كريمينالدىق قامقورلىق، مال ۇرلىعى) قاتىسى بار. كۇدىكتىلەردى ۇستاۋ جانە تۇرعىلىقتى جەرلەرىن ءتىنتۋ بارىسىندا 4 بىرلىك اتىس قارۋى، 177 ءوق-دارى، 7 گراناتا، ارنايى قۇرالدار، سونداي-اق ءۇ.ج. قاڭتاردا مارودەرلىككە قاتىسقاندارىن راستايتىن زاتتار (راديوستانسيالار، «پر» دۋبينكالارى، بروندى كەۋدەشە) تاركىلەندى. ۇستالعاندار قاجد 8-تي جانە ۇقك الماتى قالاسى بويىنشا دەپارتامەنتىنىڭ تەرگەۋ يزولياتورلارىنا قامالدى. ق ر قك 287-بابىنىڭ 3 جانە 4-بولىكتەرى (اتىس قارۋىن، ءوق-دارiلەردi، جارىلعىش زاتتاردى نەمەسە جارىلىس قۇرىلعىلارىن زاڭسىز يەمدەنۋ، بەرۋ، وتكiزۋ، ساقتاۋ، تاسىمالداۋ نەمەسە الىپ ءجۇرۋ) بويىنشا قىلمىستىق ىستەر قوزعالدى.

جەدەل تەرگەۋ ءىس-شارالارى كەشەنىنىڭ ناتيجەسىندە توپ مۇشەلەرى ۇقت مۇشەلەرىنە تيەسىلى قارۋى بار «كومبەلەردى» كورسەتۋگە ويىستى. الماتى وبلىسى ەڭبەكشىقازاق اۋدانىندا ەكى «كومبە» انىقتالىپ، ولاردان 44 بىرلىك اتىس قارۋى جانە 3 بىرلىك سۋىق قارۋ، سونداي-اق 20 بىرلىك وق-دارىلەر الىندى. الىنعان قارۋ-جاراقتى، سونداي-اق ولاردى قاڭتار وقيعالارىندا قولدانۋدى سايكەستەندىرۋ بويىنشا ءىس-شارالار جۇرگىزىلىپ جاتىر.

جەدەل تەرگەۋ ءىس-شارالارى جالعاسۋدا.