الماتى قالاسىنداعى «عىلىم ورداسى» عيماراتىندا قازاق-نەمىس عىلىمي-زەرتتەۋ ىنتىماقتاستىق ورتالىعى (KGRCC) رەسمي اشىلدى. 
بۇل شارا گەرمانيا فەدەرالدى كانسلەرى ولاف شولستىڭ قازاقستانعا جاساعان مەملەكەتتىك ساپارى اياسىندا ۇيىمداستىرىلدى. ورتالىق قازاقستان رەسپۋبليكاسىنىڭ پرەزيدەنتى جانىنداعى ۇلتتىق عىلىم اكادەمياسى مەن قازاقستان-نەمىس ۋنيۆەرسيتەتىنىڭ (قنۋ) سەرىكتەستىگىنىڭ نەگىزىندە قۇرىلدى، دەپ حابارلايدى aqshamnews.kz.
اشىلۋ راسىمىندە قازاقستان ۇلتتىق عىلىم اكادەمياسىنىڭ پرەزيدەنتى، پروفەسسور اقىلبەك قاجىعۇل ۇلى كۇرىشبايەۆ پەن قازاقستان-نەمىس ۋنيۆەرسيتەتىنىڭ پرەزيدەنتى، پروفەسسور ۆولراد روممەل قۇتتىقتاۋ سوزدەرىن سويلەدى. ەكى ەلدىڭ باسشىلارى جاڭا ورتالىقتىڭ قازاقستان مەن گەرمانيا اراسىنداعى عىلىمي بايلانىستاردى كەڭەيتىپ، بىرلەسكەن زەرتتەۋ جوبالارىن جۇزەگە اسىرۋعا جانە عىلىم مەن تەحنولوگيا سالاسىنداعى يننوۆاسيالاردى دامىتۋعا ستراتەگيالىق ماڭىزدىلىعىن اتاپ ءوتتى.
بۇل ورتالىق اكادەميانىڭ جاڭارتىلعان عيماراتىندا جۇزەگە اسىرىلعان العاشقى حالىقارالىق جوبا رەتىندە ايرىقشا ماڭىزعا يە جانە اكادەميا تاريحىنداعى جاڭا كەزەڭنىڭ باستاۋىن بىلدىرەدى.
راسىمگە قازاقستان مەن گەرمانيانىڭ عىلىمي جانە ءبىلىم بەرۋ سالالارىنىڭ جوعارى دارەجەلى وكىلدەرى، سونىڭ ىشىندە قازاقستان ۇلتتىق عىلىم اكادەمياسى مەن قازاقستان-نەمىس ۋنيۆەرسيتەتىنىڭ باسشىلىعى قاتىستى. سونىمەن قاتار، نەمىس زەرتتەۋ قوعامىنىڭ (DFG) حالىقارالىق بايلانىستار ءبولىمىنىڭ جەتەكشىسى دوكتور يورگ شنايدەر باستاعان دەلەگاسيامەن جۇمىس كەزدەسۋى ۇيىمداستىرىلدى. DFG ۋنيۆەرسيتەتتەر مەن عىلىمي-زەرتتەۋ مەكەمەلەرىندەگى عىلىمي جوبالاردى قارجىلاندىرۋ ارقىلى عىلىمنىڭ بارلىق سالالارىنا قولداۋ كورسەتىپ، جاس عالىمداردى قولداۋعا جانە عىلىمداعى گەندەرلىك تەڭدىكتى قامتاماسىز ەتۋگە ەرەكشە نازار اۋدارادى.
كەزدەسۋ بارىسىندا قازاقستان مەن گەرمانيا اراسىنداعى عىلىمي ىنتىماقتاستىقتى كەڭەيتۋ پەرسپەكتيۆالارى، بىرلەسكەن زەرتتەۋ جوبالارىن قارجىلاندىرۋ جانە عالىمدار ءۇشىن جەلىلىك باستامالاردى قۇرۋ ماسەلەلەرى تالقىلاندى.
ءىس-شارانىڭ قورىتىندىسىندا قازاق-نەمىس عىلىمي-زەرتتەۋ ىنتىماقتاستىق ورتالىعىن (KGRCC) قۇرۋ تۋرالى رەسمي كەلىسىمگە قول قويىلدى. بۇل ورتالىق قازاقستان مەن گەرمانيا اراسىنداعى اكادەميالىق جانە عىلىمي بايلانىستاردى نىعايتۋعا، ۇزاق مەرزىمدى حالىقارالىق ارىپتەستىكتەردى دامىتۋعا، سونداي-اق وزىق زەرتتەۋ جوبالارىن جۇزەگە اسىرۋعا ماڭىزدى پلاتفورما بولادى دەپ كۇتىلۋدە.