«قاسبەتتەن قاسبەتكە دەيىن» تازالىق پەن جاڭارۋ: الماتىدا كەشەندى كورىكتەندىرۋ باعدارلاماسى جۇزەگە اسىرىلىپ جاتىر، دەپ حابارلايدى aqshamnews.kz
«تازا قازاقستان»: الماتىدا «قاسبەتتەن قاسبەتكە دەيىن» قاعيداتى بويىنشا جۇرگىزىلەتىن كورىكتەندىرۋ كوممۋنالدىق قىزمەت پەن بيزنەستى بىرىكتىرەدى
الماتىدا «تازا قازاقستان» اتتى قالانى كوركەيتۋ بويىنشا اۋقىمدى باستاما جالعاسىپ جاتىر. بيىلعى جۇمىس «قاسبەتتەن قاسبەتكە دەيىن» قاعيداتى بويىنشا جۇرگىزىلىپ، تەك تازالاۋ ەمەس، بۇكىل قالالىق ورتانى جاڭارتۋدى قامتيدى.
كورىكتەندىرۋ جۇمىسىنا 1000 ارنايى تەحنيكا جانە شامامەن 1500 جۇمىسشى تارتىلعان. ولار قالادان 2400 تەكشە مەتردەن استام قوقىس شىعارعان. 28 ساۋىردە «تازا قازاقستان» اكسياسىنىڭ ءۇشىنشى كەزەڭى باستالدى. تروتۋارلاردى تولىق تازالاۋ، اعاشتاردى سانيتارلىق ماقساتتا كەسۋ، كوشە شامدارىن قالپىنا كەلتىرۋ جانە كوگالداندىرۋ جوسپارلانعان.
ناۋقاننىڭ ماقساتى – مەگاپوليستىڭ بارلىق سەگىز اۋدانىنداعى جالپى ۇزىندىعى شامامەن 355 كم بولاتىن 142 كوشەنى جاڭارتۋ. كەشەندى تازالاۋ اياسىندا تروتۋارلاردى قالپىنا كەلتىرۋ، شۇڭقىرلى جوندەۋ، اعاشتاردى سانيتارلىق ماقساتتا كەسۋ، كوشە شامدارىن جوندەۋ جانە كوگالداندىرۋ كوزدەلگەن.
الماتى اكىمىنىڭ ورىنباسارى بەيبىت شاحانوۆ بيىلعى باعدارلاماعا ءبىرقاتار وزگەرىس ەنگىزىلگەنىن اتاپ ءوتتى – ەندى اكسياعا عيمارات يەلەرىن تارتۋ كوزدەلگەن. ول قالانى تازالاۋدى عانا ەمەس، سونىمەن قاتار كوشەلەردىڭ سىرتقى كەلبەتىن جاقسارتۋدى دا قامتيدى.
«بارلىق ءۇي يەلەرى مەن بيزنەسمەندەر كورىكتەندىرۋ ءتولقۇجاتىن العاننان كەيىن اۋماعىنا جاۋاپتى بولادى. ولار ايماعىنىڭ كەلبەتىن – باعانالاردى، ماڭدايشالاردى، كىرەبەرىس ساتىنى رەتكە كەلتىرۋگە ءتيىس. اكسيا اياسىندا 158 كورىكتەندىرۋ ءتولقۇجاتى بەرىلىپ، 43 اكىمشىلىك ايىپپۇل سالىندى. ءار كوشە بولىمىنە ءارتۇرلى قۇرىلىم جاۋاپتى – مىسالى، باعانالارعا اۋدان اكىمدىگى، جول مەن باعدارشامدارعا – قالالىق موبيلدىلىك باسقارماسى جاۋاپتى. وسى جۇمىستىڭ ناتيجەسىندە قالامىز تازا ءارى كورىكتى بولا تۇسەدى»، – دەدى بەيبىت شاحانوۆ.
قالالىق ينفراقۇرىلىمدى جاقسارتۋداعى ماڭىزدى قادامنىڭ ءبىرى – كولەمى ۇلعايتىلعان 12 مىڭنان استام قوقىس جاشىگىن ورناتۋ بولدى. سونىمەن قاتار، كوگالدارداعى توپىراقتى وڭدەۋ جۇمىستارى جۇرگىزىلۋدە: جەردىڭ تىعىزدالعان جوعارعى قاباتى الىنىپ، اۋا مەن ىلعالدىڭ تامىرلارعا جەتۋى جاقسارتىلۋدا. مۇنداي جۇمىس كوگالدى ايماقتاردىڭ قىس مەزگىلىنەن كەيىن تەزىرەك قالپىنا كەلۋىنە كومەكتەسەدى.
«تازا قازاقستان» اكسياسىنىڭ ءوتۋ بارىسى تۋرالى قالا تۇرعىندارى مەن كوممۋنالدىق قىزمەت وكىلدەرى دە پىكىر ءبىلدىردى.
«مەن بۇل جەردە ۇزاق جىلدان بەرى تۇرامىن، جىل وتكەن سايىن اۋداننىڭ تازارىپ، جايلى بولا باستاعانىن بايقايمىن. قىستا كوشەلەر ۇنەمى قاردان تازارتىلىپ، تايعاق بولماس ءۇشىن قۇم سەبىلدى. ءقازىر كوكتەمدە قوقىس جينالىپ، سىرلاۋ، اعاشتاردى كەسۋ، عيماراتتاردىڭ قاسبەتىن جۋۋ جۇمىستارى ءجۇرىپ جاتىر. جۇمىستىڭ كەشەندى تۇردە جۇرگىزىلىپ جاتقانى كورىنىپ تۇر. دەگەنمەن، تازالىق كوممۋنالدىق قىزمەتكك عانا ەمەس، وزىمىزگە دە بايلانىستى»، – دەيدى مەدەۋ اۋدانىنىڭ تۇرعىنى اسىلجان ابدۋمۋتالييەۆ.
ءوز كەزەگىندە كوممۋنالدىق قىزمەتكەرلەر ءۇشىن تۇرعىنداردىڭ قولداۋى ماڭىزدى.
«اۋدان تازا ءارى كۇتىمدى بولۋى ءۇشىن تاڭنان كەشكە دەيىن اياعىمىزدان تىك تۇرىپ، سىپىرامىز، قوقىس جينايمىز، ارىقتاردى تازالايمىز. ادامداردىڭ العىسى مەن جىلى ءسوزى جۇمىسىمىزدىڭ ماڭىزىن سەزىندىرەدى. قاراپايىم قوقىس تاستاماۋ – بۇل دا ءبىز ءۇشىن ۇلكەن قولداۋ مەن ماماندىعىمىزعا دەگەن قۇرمەتتىڭ بەلگىسى»، – دەيدى «الماتى تازالىق» قىزمەتكەرى انارگۇل بەيسەنبەك.
