الماتىدا قارۋ-جاراق دۇكەنىن توناۋعا قاتىسقاندار ءمان-جايدى ايتىپ بەردى

كۇدىكتىلەردەن بەس مىلتىق تاركىلەندى

الماتى قالالىق پوليسيا دەپارتامەنتىنىڭ مالىمەتىنشە، «كامەراد» قارۋ-جاراق دۇكەنىن توناعان ءۇش ادام ۇستالدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«ەكى كۇدىكتى الماتى وبلىسىنىڭ، تاعى بىرەۋى جامبىل وبلىسىنىڭ تۇرعىنى. ولاردىڭ بىرەۋى بۇرىن توناۋ بويىنشا سوتتى بولعان. ولار 22-24 جاستا. كۇدىكتىلەر قاماۋعا الىندى. ۇستالعانداردىڭ باسقا دا زاڭسىز ارەكەتتەرگە، سونىڭ ىشىندە قاڭتارداعى جاپپاي تارتىپسىزدىكتەرگە قاتىسى بار-جوعى تەكسەرىلىپ جاتىر»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى بەرىك ابىلبەكوۆ.

تەرگەۋ بارىسىندا ۇستالعاندار ءبىر اۋىزدان قارۋ-جاراق دۇكەنىن بەلگىسىز ادامداردىڭ بۇيرىعىمەن توناعاندارىن ايتتى.

«ءبىر بەيتانىس جىگىت كولىگىمە وتىرىپ، شالياپين مەن ساين كوشەلەرىنە بارۋىمدى بۇيىردى. مەن باردىم. دۇكەندى توناعاننان كەيىن ول ادام جوعالىپ كەتتى. ونىڭ كىم جانە ءقازىر قايدا ەكەنىن بىلمەيمىن»، – دەدى ۇستالعان كۇدىكتى. «ءبىز كوپ بولدىق. ۇرلانعان قارۋدى مەن تىعىپ قويدىم»، – دەدى كەزەكتى ۇستالعان كۇدىكتى.

انىقتالعانداي، ۇستالعانداردىڭ ۇشەۋىنىڭ دە تۇراقتى جۇمىسى جوق.