بۇكىل الەمدە 1 قازاندا قارتتار كۇنى اتاپ وتىلەدى. الماتى قالاسى الەۋمەتتىك ءال-اۋقات باسقارماسى باسشىسىنىڭ ورىنباسارى مىندەتىن اتقارۋشى جانىبەك قاراتايەۆ وڭىرلىك كوممۋنيكاسيالار قىزمەتى الاڭىندا قالادا قارت ادامدارعا قانداي قامقورلىق كورسەتىپ جاتقانىن ايتىپ بەردى، دەپ حابارلايدى almaty-akshamy.kz
جانىبەك قاراتايەۆ اتاپ وتكەندەي، قارت ادامدار بارلىق كەيىنگى ۇرپاق ءۇشىن باعدار بولىپ تابىلادى.
«بۇل كۇن بىزگە اعا بۋىننىڭ تاعدىرى تۋرالى ويلانۋعا، ەل مەن قالامىزدىڭ دامۋىنا ۇلكەن ۇلەس قوسقان ادامدارعا ءوز ريزاشىلىعىمىز بەن سۇيىسپەنشىلىگىمىزدى بىلدىرۋگە مۇمكىندىك بەرەدى. قارتتار كۇنى – بۇل جاس تۋرالى ەسكە سالۋ ەمەس، جاس ۇرپاقتى تاربيەلەگەنى، قاجىرلى ەڭبەگى ءۇشىن ورتاق العىس ءبىلدىرۋ كۇنى»، - دەپ اتاپ ءوتتى اكىمدىك وكىلى.
الەۋمەتتىك ءال-اۋقات باسقارماسى باسشىسىنىڭ ورىنباسارى الماتى اكىمدىگى ەگدە جاستاعى ازاماتتارعا تولىققاندى ءومىر سالتىن جۇرگىزۋگە مۇمكىندىك بەرەتىن جاعدايلار جاساۋ بويىنشا ءبىرقاتار شارالار قابىلداپ جاتقانىن حابارلادى.
ءقازىر الماتىدا شامامەن 231 مىڭ زەينەتكەر نەمەسە ولار قالا حالقىنىڭ 11،5% قۇرايدى. جىل سايىن قالالىق بيۋدجەتتەن ماتەريالدىق جانە الەۋمەتتىك قولداۋ كورسەتۋگە قوماقتى قاراجات بولىنەدى.
جانىبەك قاراتايەۆ قالادا مۇقتاج وتباسىلارعا الەۋمەتتىك تولەمدەردىڭ 17 ءتۇرى كورسەتىلەتىنىن حابارلادى. زەينەتكەرلەرگە، ونىڭ ىشىندە ۇلى وتان سوعىسىنىڭ ارداگەرلەرىنە، تىل ەڭبەككەرلەرىنە جەڭىس كۇنىنە وراي تولەمدەر جۇزەگە اسىرىلادى جانە كوممۋنالدىق قىزمەتتەر ءۇشىن شىعىندار وتەلەدى. بۇدان باسقا، سۋدى، گازدى ەسەپكە الۋ اسپاپتارىن جانە گاز جابدىعىن ورناتۋ شىعىندارى وتەلەدى. جاسى بويىنشا زەينەتكەرلەرگە بازالىق زەينەتاقىنى ەسەپتەمەگەندە، 25% تولەممەن ساناتورلىق-كۋرورتتىق ەمدەۋ قىزمەتى ۇسىنىلادى.
«الەۋمەتتىك تولەمدەر ءوتىنىش نەگىزىندە جانە بەلگىلى ءبىر ولشەمدەردى ەسكەرە وتىرىپ كورسەتىلەدى. مىسالى، جەڭىس كۇنىنە وراي 16 800 ارداگەرگە 1،2 ملرد تەڭگە سوماسىندا ماتەريالدىق كومەك كورسەتىلدى، 150 مىڭعا جۋىق زەينەتكەردىڭ كوممۋنالدىق شىعىستارىنا تولەمدەر ءبولىندى، 1 600-دەن استام قالا تۇرعىندارىنا تۇرعىن ءۇي كومەگى كورسەتىلدى»، - دەدى جانىبەك قاراتايەۆ.
سوڭىندا باسقارما وكىلى جەكە باستاماسى بويىنشا ەگدە جاستاعى ادامدارعا كومەكتەسەتىن الماتىلىقتارعا، مەسەناتتارعا العىسىن ءبىلدىردى. ول الماتىنىڭ قارت تۇرعىندارى كوڭىل اۋدارۋدى، قاراپايىم ادامداردىڭ قاتىسۋىن قاجەت ەتەتىنىن، ال جەرگىلىكتى اتقارۋشى ورگاندار تاراپىنان قولداۋ جان-جاقتى كورسەتىلەتىنىن اتاپ ءوتتى.