تاجىكستان ازاماتتارى التىن بۇيىمدار مەن ۇيالى تەلەفون تونادى دەگەن كۇدىككە ءىلىندى. ءۇش ەر ادام جاس كەلىنشەكتىڭ پاتەرىنە كىرىپ، مۇلكىن تارتىپ العان، دەپ حابارلايدى Almaty-akshamy.kz. zakon.kz سىلتەمە جاساپ.
جەتىسۋ اۋداندىق پوليسيا باسقارماسىنىڭ باستىعى جانىبەك شىناسىلوۆنىڭ ايتۋىنشا، ۇرلانعان زاتتار تاركىلەنىپ، زاتتاي ايعاق رەتىندە ءىس ماتەريالدارىنا تىركەلگەن.
-جابىرلەنۋشى ۇيدە بولعان. تاڭەرتەڭگى ساعات 10:00 شاماسىندا بەتپەردە مەن باس كيىم جانە قارا سپورتتىق كيىم كيگەن ءۇش جىگىت پاتەردىڭ اشىق تۇرعان ەسىگىنە كىرىپ كەلگەن. ولار كۇش قولدانامىز دەپ قورقىتىپ، التىن بۇيىمدار مەن IPhone 11 ماركالى تەلەفونىن تارتىپ العان. ايتپاقشى، قىز شابۋىل جاساۋشىلاردىڭ بىرىنەن اناسىنىڭ تانىسىن تانىعان. جەدەل-ىزدەستىرۋ شارالارى بارىسىندا كۇدىكتىلەر ۇستالدى. ولار 28، 27 جانە 31 جاستاعى تاجىكستان ازاماتتارى. سونداي-اق كۇدىكتىلەر قىلمىس ورنىنا Lada Priora كولىگىمەن كەلگەنى انىقتالدى. ۇرلانعان زاتتار تاركىلەنىپ، زاتتاي ايعاق رەتىندە ءىس ماتەريالدارىنا تىركەلدى. ۇستالعاندار قاماۋعا الىندى، – دەدى جەتىسۋ اۋداندىق پوليسيا باسقارماسىنىڭ باستىعى جانىبەك شىناسىلوۆ.
تەرگەۋ قاراقشىلىق شابۋىلعا باسقا كۇدىكتىلەردىڭ دە قاتىسى بارىن جوققا شىعارمايدى. ولاردىڭ جەكە باسى انىقتالىپ جاتىر.
قاماۋعا الۋ شارالارى جۇرگىزىلىپ جاتىر. قازاقستان رەسپۋبليكاسى قىلمىستىق-پروسەستىك كودەكسىنىڭ 201-بابىنا سايكەس تەرگەۋ مۇددەسىن كوزدەيتىن وزگە دە مالىمەتتەر تاراتۋعا جاتپايدى.
ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.