الماتىلىقتاردى قانتتىڭ ءارتۇرلى باعاسى تاڭقالدىردى. وسىعان وراي قالادا اۋدان اكىمدىگى الەۋمەتتىك ماڭىزى بار ءونىمنىڭ قۇنىن اسىرا كوتەرۋ فاكتىسىن تەكسەردى، دەپ حابارلايدى Almaty-akshamy.kz
Facebook الەۋمەتتىك جەلىسىندە قالا تۇرعىنى شالياپين – مومىش ۇلى كوشەلەرىنىڭ قيىلىسىنداعى دۇكەندەردىڭ بىرىنەن قانتتىڭ كەلىسىن 750 تەڭگەدەن، ال قالانىڭ باسقا ءبىر بولىگىندە ونى 475 تەڭگەدەن ساتىپ العانىن جازعان. سونداي-اق ول تۇبىرتەكتەردىڭ سۋرەتىن جۇكتەدى.
الەۋمەتتىك جەلىدەگى جازبادان كەيىن اۋەزوۆ اۋدانىنىڭ اكىمدىگى اتالعان دۇكەندى تەكسەردى. قانتتىڭ قىمباتتاۋ فاكتىسى راستالمادى.
«ءقازىر ول جەردە قانتتىڭ كەلىسى 496 تەڭگەدەن ساتىلىپ جاتىر. دۇكەن اكىمشىلىگى باعانى كوتەرمەگەنىن ايتتى»، – دەيدى اۋەزوۆ اۋدانى اكىمى اپپاراتىنىڭ كاسىپكەرلىكتى جانە ونەركاسىپتى دامىتۋ ءبولىمىنىڭ باسشىسى ايبول ومىربەكوۆ.
سونىمەن قاتار، ول اۋداندا الەۋمەتتىك ماڭىزى بار ازىق-تۇلىك تاۋارلارىنىڭ نەگىزسىز قىمباتتاۋىنا بايلانىستى ءۇي ماڭىنداعى ازىق-تۇلىك دۇكەندەرى مەن بازارلارعا اپتا سايىن مونيتورينگ جۇرگىزىلەتىنىن جەتكىزدى.