قىلمىستىق ىستەردى تەرگەۋ جالعاسۋدا
الماتىدا قاڭتار وقيعاسىندا زارداپ شەككەن ازاماتتارعا 11 ملرد تەڭگە تولەندى. بۇل تۋرالى ق ر ءىىم تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«ىشكى ىستەر مينيسترلىگى ءوز قۇزىرەتى اياسىندا «قاڭتار وقيعالارى» بويىنشا قىلمىستىق ىستەردى تەرگەۋدى جالعاستىرۋدا. بۇگىنگى تاڭدا ىشكى ىستەر ورگاندارى تەرگەۋشىلەرىنىڭ وندىرىسىندە 758 قىلمىستىق ءىس بار. نەگىزگى جۇكتەمە الماتى قالاسى تەرگەۋشىلەرىنىڭ ەنشىسىندە، وندا 560 ءىس بار. جاپپاي تارتىپسىزدىكتەردى ۇيىمداستىرعان ادامدار وسى پروسەستەرگە كوپتەگەن ادامداردى ماقساتتى تۇردە تارتىپ، وڭتۇستىك استانادا ۇرلىق، توناۋ جاسالۋىنا جانە قارۋدىڭ جىمقىرىلۋىنا ىقپال ەتكەن. وسى قالادا بولعان جاپپاي تارتىپسىزدىك بارىسىندا شامامەن ءبىر جارىم مىڭنان استام ءارتۇرلى عيماراتقا شابۋىل جاسالدى، 240-تان استام اۆتوكولىك ءبۇلىندى نەمەسە جويىلدى»، - دەدى سانجار ءادىلوۆ ورتالىق كوممۋنكاسيالار قىزمەتىندەگى بريفينگىدە.
ونىڭ اتاپ وتۋىنشە، تارتىپسىزدىكتەرگە قاتىسۋشىلاردىڭ توناۋ ماقساتىندا ارناۋلى تەحنيكا مەن اۋىر جۇكتى تاسىمالدايتىن اۆتوماشينالارمەن اكىمشىلىك عيماراتتاردىڭ قورشاۋىن، بانكتەر مەن ساۋدا نۇكتەلەرىنىڭ قابىرعالارىن سوعىپ قيراتۋ فاكتىلەرى دە بار.
«ادال ازاماتتار كوشەلەرگە شىعۋعا قورىققاندىقتان بىرنەشە تاۋلىك بويى پاتەرلەرىندە جاسىرىنۋعا ءماجبۇر بولدى. قالانىڭ تاريحي-مادەني نىساندارى تاعىلىققا ۇشىرادى نە ءبۇلدىرىلدى. نەگىزىنەن بۇل رەسپۋبليكا الاڭىنىڭ ماڭىندا ورنالاسقان نىساندار، ولار قازىرگى ۋاقىتقا دەيىن قالپىنا كەلتىرىلۋدە. ال قىلمىسكەرلەر كەلتىرگەن زالال ميللياردتاعان تەڭگەگە باعالانادى»، - دەدى ول.
دەپارتامەنت باستىعىنىڭ دەرەگىنشە، قىلمىستىق ەلەمەنتتەر ازاماتتاردىڭ اۆتوكولىكتەرىنەن باسقا، مەديسينالىق جاردەم كورسەتۋگە جانە ورتتەردى وقشاۋلاۋ ءۇشىن شاقىرۋ بويىنشا بارا جاتقان جەدەل جاردەم مەن ورتكە قارسى قىزمەتتىڭ اۆتوماشينالارىن دا ءبۇلدىردى. مۇنان باسقا بۇزاقىلاردىڭ جولىنداعى تۇراقتاردا تۇرعان اۆتوماشينالار ورتەندى. پوليسيانىڭ اۆتوماشينالارى ەش سەبەپسىز جويىلدى جانە تونالدى.
«قاڭتار وقيعالارىنىڭ سالدارىن جويۋ ءۇشىن ۇلتتىق ەكونوميكا مينيسترلىگى «مەملەكەتتىڭ جەكەلەگەن وڭىرلەرىندە تارتىپسىزدىكتەردىڭ ناتيجەسىندە كىشى جانە ورتا كاسىپكەرلىك سۋبەكتىلەرىنە كەلتىرىلگەن مۇلىكتىك زالالدى وتەۋ قاعيدالارىن» بارىنشا قىسقا مەرزىمدە ازىرلەپ بەكىتتى. مەملەكەت الماتى قالاسى بويىنشا قاڭتار وقيعاسى بارىسىندا زارداپ شەككەن ازاماتتارعا شامامەن 11 ملرد تەڭگە تولەدى. قاڭتار وقيعاسى بارىسىندا اۆتوموبيلدەرى بۇلىنگەن الماتى قالاسىنىڭ تۇرعىندارىنا تاعى 258 ملن تەڭگە تولەندى»، - دەدى سانجار ءادىلوۆ.