«ورنەك» لاگەرى «جانۇيا» مامانداندىرىلعان مەكتەپ-ينتەرناتىنىڭ تاربيەلەنۋشىلەرىن قابىلدادى.
وندا 5 پەن 18 جاس ارالىعىنداعى بالالار جازعى كانيكۋلىن وتكىزەدى. بىلىكتى ماماندار قىزىقتى ترەنينگتەر، شەبەرلىك ساباقتارى جانە سپورتتىق سايىستار ۇيىمداستىرىپ جاتىر. «ورنەك» لاگەرى الماتىداعى وقۋشىلار سارايىنا قارايدى. لاگەردىڭ جۇمىسى ادەتتەگىدەي تاڭعى جاتتىعۋدان باستالادى. ودان كەيىن تاڭعى اس ىشكەن وقۋشىلارعا ءبىر كۇننىڭ ساباق كەستەسى جاريالانادى. ءار كۇننىڭ باعدارلاماسى ءارتۇرلى بولعاندىقتان وقۋشىلاردى جالىقتىرمايدى، - دەيدى تالىمگەرلەر.
«ءبىزدىڭ ماقساتىمىز – وقۋشىلار بويىندا پاتريوتتىق سەزىمدەردى وياتۋ. وتانعا دەگەن سۇيىسپەنشىلىكتى تاربيەلەۋ. سونىمەن قاتار ادامي قاسيەتتەر مەن سالاۋاتتى ءومىر سالتىن قالىپتاستىرۋ بولىپ تابىلادى»، - دەدى «ورنەك» لاگەرىنىڭ تالىمگەرى گۇلجان راحمانبەكوۆا.
لاگەردە ءقازىر 80-گە جۋىق بالا جازعى دەمالىسىن وتكىزىپ جاتىر. وقۋشىلار 10 كۇن ىشىندە نەگىزگى ساباقتاردان وزگە دە كۆادراتكوپتەر ۇشىرىپ، گەوينفورماتيكا، بيونەيروتەحنولوگيالار جانە ديزاين تاقىرىبى بويىنشا شەبەرلىك ساباعىنا قاتىسادى. ءتىپتى ءتۋريزمدى دامىتۋدىڭ قىر-سىرىن ۇيرەنەدى.
«مۇندا تۋريستىك سالانىڭ ماماندارى كەلىپ تۇرادى. بالالارعا تابيعات اياسىندا وت جاعۋدى، شاتىر قۇرۋدى، قاناتتى جولدارمەن ءجۇرۋدى ۇيرەتەدى. مۇنداي ساباقتار وقۋشىلار ءۇشىن وتە قىزىق»، - دەيدى «ورنەك» لاگەرىنىڭ اۋىسىم باسشىسى باۋىرجان بەكتايەۆ.
لاگەردەگى بالالار ءار توپقا ءبولىنىپ، جارىستار وتكىزىپ وتىرادى. دوپ تەۋىپ، ۆولەيبول جانە باسكەتبول وينايدى. اراسىندا كىتاپحاناعا جينالىپ، بىلىمدەرىن جەتىلدىرەدى.
«مەن تاماق جاساۋدى، ساحناعا شىعۋ، ولەڭ ايتۋ، ءارتۇرلى بيلەرگە قاتىسىپ، كۇشتى ويىندار ويناۋدى ۇيرەندىم. لاگەردە ماعان كوبىنەسە ءارتۇرلى ۇيىرمەلەر ۇناپ جاتىر. ادەمى، قىزىقتى زاتتار تالىمگەرلەر بىزبەن جۇمىس ىستەپ جاتىر»، - دەيدى وقۋشى ايشا شىناسىلوۆا.
«ورنەك» لاگەرىنىڭ شاكىرتتەرى تابيعاتتى كۇتىپ، باپتاۋدى دا ۇيرەنىپ جاتىر. تالىمگەرلەر اعاشتار مەن گۇلدەردى سۋارۋدىڭ، ولاردى ءوسىرۋدىڭ دۇرىس جولدارىن كورسەتەدى. جوبانىڭ ماقساتى – بالالاردىڭ پاتريوتتىق سەزىمىن ارتتىرۋ. سالاۋاتتى ءومىر سالتىنا باۋلىپ، قورشاعان ورتانى ايالاۋعا شاقىرۋ.