بالالار اراسىندا مەكومەكتىڭ قانداي تۇرىنە دەگەن سۇرانىس جوعارى بولىپ تۇر جانە وعان قانشا قارجى جۇمسالدى. بالالاردى قورعاۋ كۇنى قارساڭىندا مسق الماتى قالالىق فيليالى وسى تاقىرىپقا قاتىستى مالىمەتتەرمەن ءبولىستى.
دەنساۋلىعى ەندى قالىپتاسىپ كەلە جاتقان بالا جانى وتە نازىك. ءبىزدىڭ ۇكىمەتىمىز بالالارعا قولجەتىمدى، دەر كەزىندە مەديسينالىق كومەك كورسەتۋ ارقىلى دۇنيەگە كەلگەن ساتتەن باستاپ ەرەكشە قامقورلىق جاساپ كەلەدى. ال، مەديسينالىق ساقتاندىرۋ جۇيەسىندە بالالار 18 جاسقا دەيىن مەملەكەت تاراپىنان ساقتاندىرىلعان.
ءقازىر الماتى قالاسىندا 18 جاسقا دەيىنگى 644 مىڭنان استام بالا تۇرادى. ولاردىڭ ءارقايسىسى ۋاقىتىلى ءارى ساپالى مەديسينالىق كومەك الۋعا قۇقىلى.
ستاسيونارلىق مەديسينالىق كومەك
بيىل 4 ايدا الماتىدا 35 مىڭنان استام بالا كەپىلدەندىرىلگەن تەگىن مەديسينالىق كومەك جانە ءمامس پاكەتتەرى شەڭبەرىندە ستاسيونارلىق ەم العان. بۇعان قور 10 ملرد تەڭگەدەن استام قاراجات ءبولدى. ستاسيوناردا كورسەتىلگەن ەم-دومنىڭ دەنى جۇقپالى اۋرۋلار، حيرۋرگيا، ۋرولوگيا، نيەۆرولوگيا، نەيروحيرۋرگيا جانە رەابيليتاسيا باعىتتارى.
ونىڭ ىشىندە – 83 وتا جوعارى تەحنولوگيالاردىڭ كومەگىمەن جاسالعان. بۇعان قور 348،4 ملن تەڭگە تولەدى.
بالالارعا كورسەتىلگەن كومەك اراسىندا مەديسينالىق وڭالتۋدىڭ الاتىن ورنى ەرەكشە. وتكەن 4 ايدا قالا بويىنشا 3 086 بالا جالپى قۇنى 898،6 ملن تەڭگەلىك رەابيليتاسيادان وتكەن. ولاردىڭ اراسىندا اۋىر دەرتتەر مەن كۇردەلى وتادان كەيىن دەنساۋلىعىن قالپىنا كەلتىرۋگە مۇمكىندىك العان بالالار دا بار.
باستاپقى مەديسينالىق كومەك جايلى
2025 جىلدىڭ باستاپقى 3 ايىندا بالالار 360 مىڭنان استام سالالىق ماماننىڭ كونسۋلتاسياسىن العان. كوبىنە ولار وفتالمولوگ، حيرۋرگ، لور، ستوماتولوگ جانە نيەۆروپاتولوگ ماماندارعا جۇگىنگەن.
اۋرۋدىڭ الدىن الۋعا باعىتتالعان پروفيلاكتيكالىق تەكسەرۋلەر – بالا دەنساۋلىعىن ساقتاۋدىڭ اجىراماس بولىگى. قالا ەمحانالارىندا 300 مىڭنان استام بالا تەگىن پروفيلاكتيكالىق تەكسەرۋدەن وتكەن. وعان 857،4 ملن تەڭگە جۇمسالدى.
سونىمەن قاتار، بالالار مەكتەپتەردە دە ۇزدىكسىز مەديسينالىق كومەكپەن قامتاماسىز ەتىلگەن. بۇل اسىرەسە، دەنساۋلىعى تۇراقتى قاداعالاۋدى قاجەت ەتەتىن بالالار ءۇشىن ماڭىزدى باعىتتاردىڭ ءبىرى. اتالعان ۋاقىت ارالىعىندا ءبىلىم وردالارىندا 4 547 وقۋشىعا مەدكومەك كورسەتىلگەن.
مەكتەپتە وقيتىن بالالاردى تەگىن دارى-دارمەكپەن قامتاماسىز ەتۋ قاراستىرىلعان. وسى ۋاقىت ىشىندە سوزىلمالى اۋرۋلارمەن ەسەپتە تۇرعان 19 مىڭنان استام بالاعا 2،5 ملرد تەڭگەنىڭ ءدارىسى بەرىلگەن.
ءمامس ەنگىزىلگەلى بەرى ستوماتولوگيالىق كومەكتىڭ بالالارعا قولجەتىمدى بولا باستاعان ايتا كەتكەن ءجون. بۇگىندە الماتىلىق بالالار ەمحانالار مەن جەكە مەنشىك كلينيكالاردا تەگىن ستوماتولوگيالىق كومەككە جۇگىنىپ، كاريەس، الۆەوليت، پۋلپيت، پەريودونتيتتى ەمدەپ جاتىر. بۇعان قور 742 ملن تەڭگە جۇمسادى.
كەيىنگى جىلدارى الماتىلىق اتا-انالاردىڭ بالا جازعى دەمالىسقا شىققان كەزدە ءتىسىن ەمدەتۋدى جاقسى ادەتكە اينالدىرعانى بايقالادى. مۇنىڭ ىڭعايلى ءارى ءتيىمدى ەكەنى داۋسىز. قورمەن جۇمىس ىستيەتىن ستوماتولوگيالىق كلينيكالار ءتىزىمىن مسق الماتى فيليالىنىڭ Instagram-پاراقشاسىندا كورسەتىلگەن: @msqory_almaty.