الماتى اكىمى دارحان ساتىبالدى «الماتىباسجوسپار» - دا كەڭەس وتكىزدى، وندا وعان كاسىپورىننىڭ اعىمداعى قىزمەتى جانە قالانىڭ تۇراقتى دامۋ ستراتەگياسىن قالىپتاستىرۋ جونىندەگى جۇمىسىنىڭ نەگىزگى باعىتتارى ۇسىنىلدى.
بۇرىننان بەلگىلى، الماتىنىڭ دامۋ باعدارلاماسى مەن قالانىڭ 2040 جىلعا دەيىنگى باس جوسپارى دامۋدىڭ مونوورتالىقتىق مودەلىنەن پوليورتالىقتىق مودەلىنە كوشۋدى كوزدەيدى.
قالا باسشىسىنا بەس نەگىزگى پوليورتالىقتار — ىسكەرلىك بەلسەندىلىكتى قايتا بولۋگە، قالانىڭ ورتالىق اۋداندارىندا جۇكتەمەنى ازايتۋعا جانە بۇكىل مەگاپوليس بويىنشا تولىققاندى ءوسۋ نۇكتەلەرىن قۇرۋعا ارنالعان زاماناۋي قوعامدىق-ىسكەرلىك كلاستەرلەردى قالىپتاستىرۋ جوباسى ۇسىنىلدى.
«سولتۇستىك» پوليورتالىعى - «الماتى-1» تەمىرجول ستانسياسىنا ىرگەلەس اۋماق. بۇل پوليورتالىقتا قىزمەت كورسەتۋ سالاسى قارقىندى داميتىن بولادى، سالىنىپ جاتقان قۇرىلىستاردا ءبىرىنشى قاباتتار شاعىن بيزنەسكە جالعا بەرىلەدى، سكۆەرلەر، ۇاك، باۋم توعايى ماڭايىندا دەمالىس ورىندارى قاراستىرىلعان.
كەلەسى ايماق - «باتىس» پوليورتالىعى، جاڭا الماتى-3 تەمىرجولۆوكزالى مەن بورالداي كەنتىندەگى كولىك حابى اۋدانىندا ورنالاساتىن بولادى. مۇندا بارلىق قاجەتتى ينفراقۇرىلىم، سونىڭ ىشىندە «ساق قورعاندارى» ەتنوگرافيالىق پاركىنىڭ اينالاسىندا جۇرگىزىلەتىن بولادى. الاڭى 90 گا جەلىلىك رەكرەاسيالىق ساياباق، جاڭا كوپسالالى اۋرۋحانا كەشەنى جانە ت.ب. سالۋ جوسپارلانىپ جاتىر.
«وڭتۇستىك-باتىس» پوليورتالىعى – رايىمبەك داڭعىلى مەن الاتاۋ كوشەسىن ۇزارتۋ اۋماعىندا. مۇندا شاعىن ونەركاسىپتىك پاركتەر، ساۋدا جانە لوگيستيكا نىساندارى، اكىمشىلىك-ىسكەرلىك ورتالىقتار ورنالاسادى.
«تاريحي ورتالىق» - مەدەۋ اۋدانىنىڭ بولىگى، بايتۇرسىنوۆ كوشەسى – اباي – زەنكوۆ – جىبەك جولى داڭعىلدارىنىڭ شەكاراسىنداعى «التىن ايماق». مۇندا ونەركاسىپ ورىندارى بولمايدى، تاريحي-مادەني ماڭىزى بار عيماراتتار قالپىنا كەلتىرىلەدى.
بەسىنشى ايماق - «شىعىس قاقپاسى» پوليورتالىعى. بۇل تالعار جانە قۇلجا تراكتتارىنىڭ اۋدانى. مۇندا الماتىنىڭ لوگيستيكالىق حابى ورنالاسادى.
ءوز كەزەگىندە قالا اكىمى ءاربىر پوليورتالىق الەۋمەتتىك ينفراقۇرىلىمدى، دەمالىس ايماقتارىن جانە ادامدار مەن بيزنەستى تارتاتىن زاكىرلىك جوبالاردى ەسكەرە وتىرىپ، كەشەندى تۇردە دامۋعا ءتيىس ەكەنىن اتاپ ءوتتى.
«تۇرعىن ءۇي سالۋعا باسىمدىق بەرىلمەيتىندەي جانە 5 جىلدان كەيىن بۇل اۋداندار تىنىش اۋداندارعا اينالمايتىنداي ەتىپ جوبالاردى پىسىقتاۋ قاجەت. ساياباقتار، ساۋدا ورتالىقتارى، كەڭسەلەر جوسپارلاۋ كەزەڭىندە قاراستىرىلۋى ءتيىس. ادامدار ءومىر ءسۇرىپ قانا قويماي، جۇمىس ىستەيتىن، دەمالاتىن، بوس ۋاقىتىن وتكىزەتىن تەڭەستىرىلگەن ورتانى قۇرۋ ماڭىزدى — اۋداندار شىنايى جايلى جانە تىنىس-تىرشىلىككە تولى بولعانى ءجون»، - دەپ اتاپ ءوتتى دارحان ساتىبالدى.