21 تامىزدان باستاپ №24 جانە №125 مارشرۋتتاردىڭ جىلجىمالى قۇرامى جاڭارتىلادى.
بۇعان دەيىن №24 مارشرۋتتا 6 ديزەلدى اۆتوبۋس جۇمىس ىستەگەن. ونىڭ ورنىنا ەندى 12 جاڭا گازبەن جۇرەتىن اۆتوبۋس قىزمەت ەتەدى. جولاۋشىلاردىڭ سۇرانىسى بويىنشا بۇل باعىت ۇزارتىلدى، دەپ حابارلايدى Almaty-akshamy.kz.
ەندىگى باعىت: سايىن - مومىش ۇلى - تولە بي - روزىباكييەۆ - وجەت ىقشام اۋدانىنا دەيىن سولتۇستىك اينالما كوشەسىمەن جۇرەتىن بولادى. الدىڭعى مارشرۋت ۇاك بويىمەن جۇرەتىن. جاڭارتۋدان كەيىن قوزعالىس جيىلىگى 20 مينۋتتىڭ ورنىنا 12-13 مينۋت بولادى.
سونىمەن قاتار، №125 مارشرۋتتىڭ جىلجىمالى قۇرامى تولىعىمەن جاڭارتىلادى، وندا بۇرىن 6-7 ديزەلدى اۆتوبۋس جۇرگەن بولاتىن. 21 تامىزدان باستاپ وسى باعىتتا 10 جاڭا گازبەن جۇرەتىن اۆتوبۋس شىعارىلادى. بۇعان دەيىن اتالعان مارشرۋتتىڭ جيىلىگى 40 مينۋتقا دەيىن ۇزارعان، جاڭا اۆتوبۋستار شىققاننان باستاپ ءجۇرۋ جيىلىگى 15-18 مينۋتقا دەيىن تومەندەيدى دەپ كۇتىلۋدە.
بارلىق جاڭا اۆتوبۋس ورتاشا سىيىمدىلىقتا، ون مەترلىك، ەدەنى تومەن، مۇمكىندىگى شەكتەۋلى جولاۋشىلارعا جاعدايلار قاراستىرىلعان. سالقىنداتۋ جۇيەسىمەن جانە پەشپەن جابدىقتالعان.
ەستەرىڭىزگە سالا كەتەيىك، الماتىدا بيىل كوممۋنالدىق اۆتوپارك 600 گاز اۆتوبۋسى مەن 100 تروللەيبۋس ساتىپ الۋدى جوسپارعا ەنگىزگەن. 100 اۆتوبۋس قالاعا كەلدى جانە قۇجاتتار رەسىمدەلگەنىنە قاراي جەلىگە شىعارىلىپ جاتىر. قالعان اۆتوبۋستاردى جىل سوڭىنا دەيىن قالاعا جەتكىزۋ كوزدەلگەن.
قالالىق مارشرۋتتار تۋرالى سوڭعى جاڭالىقتار قالا اكىمدىگىنىڭ رەسمي پاراقشالارىندا جانە الماتى-جول تەلەگرام ارناسىندا جازىلعان (https://t.me/AlmatyJoly).