كەشە الماتىدا قالا كۇنىنە وراي مۋزىكالىق فەستيۆال ءوتتى، دەپ حابارلايدى Almaty-akshamy.kz.
الماتى قالاسى ءتۇرلى مەرەكەلىك شارالاردىڭ ورتالىعىنا اينالدى، قالا تۇرعىندارى مەن قوناقتارى ءتۇرلى كورمەلەر مەن جارمەڭكەلەرمەن تانىسىپ قانا قويماي،Gakku Dauysy 2022 فەستيۆالىن دە تاماشالادى.
كونسەرتتىڭ كەشكە باستالاتىنىنا قاراماستان حالىق ەكى ساعات بۇرىن الاڭعا جينالىپ، توي دۋماندى اسىعا كۇتتى. كىرۋ تەگىن بولعاندىقتان، كوپشىلىگى قازاقستاندىق جۇلدىزداردىڭ ونەرىن تاماشالۋعا الدىڭعى قاتارلاردان ورىن الۋعا تىرىستى. Gakku Dauysy 2022 فەستيۆالى وسىمەن توعىز جىل قاتارىنان وتكىزىلۋدە. اتالمىش شارانىڭ باستى ەرەكشەلىگى – جاندى داۋىس.
ءبىر ساحنادا اعا بۋىن ونەر جۇلدىزدارى مەن جاستار بىرگە ونەر كورسەتتى. كونسەرتتى ەتنو-فولكلورلىق HasSak توبى اشتى. كورەرمەندەر كەرەمەت دۋماندى كەشتى تاماشالاپ، ءتۇرلى كوللابوراسيالاردى كوردى. شاقىرىلعان ارتيستەر قاتارىندا ايقىن، دياس ابلايەۆ، مادي رىمبايەۆ، Ninety one، ايدانا مەدەنوۆا، M’dee، Darkhan Juzz، Colorit، Arshat، Akim، Mona Songz، Qanay، Kalifarniya، Mofashi،Amre، NKI، Ayree بولدى. بيىل ونەر جولىنداعى مانسابىنىڭ ون جىلدىعىن تويلايتىن الي وكاپوۆ، شوۋ-پوپۋرري دايىندادى. ال Jah Khalib فەستيۆالدىڭ باستى حەدلاينەرى اتاندى.
مەرەكەلىك شارانىڭ تاعى ءبىر ەرەكشەلىگى، كونسەرت جۇرگىزۋشىلەرى ساحنادا كورەرمەندەرمەن بىرگە گەنناديي گولوۆكيندى كانەلومەن جەكپە-جەگىنە قولداۋ ۆيدەوسىن ءتۇسىردى.
- Gakku فەستيۆالەن جىل سانى تاماشالايمىز، ءار جىلى ءتۇرلى ارتيستەر ونەر كورسەتەدى. وسىنداي مەرەكەلىك كوڭىل كۇي سىيلاعان ۇيىمداستىرۋشىلارعا العىسىمىز زور، - دەدى قالا تۇرعىنى دامەليا.
كورەرمەندەر اراسىندا باسقا قالالاردان وقۋعا ەندى قابىلدانعان ءبىرىنشى كۋرس ستۋدەنتتەرىن بايقاۋعا بولادى. ولار ءۇشىن بۇل ەستەن كەتپەس مەرەكە بولعانى انىق.
- مۇنداي اۋقىمدى شاراعا ءبىرىنشى رەت قاتىسىپ وتىرمىن. ادام كوپ، مەرەكەلىك اتموسفەرا، كەرەمەت كوڭىل كۇي، جاندى داۋىستا ارتيستەردى تىڭداۋدىڭ ءوزى كەرەمەت، - دەپ كورەرمەندەردىڭ بىرەۋى اعىنان جارىلدى.