الماتى قالاسىنىڭ اكىمى ەربولات دوسايەۆ المالى اۋدانى تۇرعىندارىمەن كەزدەسۋ بارىسىندا جىل سايىن قىركۇيەك ايىنىڭ ءۇشىنشى جەكسەنبىسىندە الماتىلىقتار اتاپ وتەتىن قالا كۇنىن مەرەكەلەۋدى ۇيىمداستىرۋ بويىنشا دايىندىق جۇمىستارى ءجۇرىپ جاتقانىن ايتتى، دەپ حابارلايدى اlmaty-akshamy.kz.
قالا اكىمىمەن كەزدەسۋگە كەلگەن المالى اۋدانىنىڭ تۇرعىنى الماتىلىقتارعا مەرەكە ۇيىمداستىرۋدى ۇسىندى.
«پاندەمياعا بايلانىستى الماتىلىقتار ەشقانداي مەرەكەنى تويلاعان جوق. ەكى جىل ۇيدە وتىردى. اۋرۋ مەن جاقىندارىن جوعالتۋ تۇرعىنداردى ابدەن شارشاتتى. بىزگە مەيرام سىيلاڭىزشى. قالا كۇنىن تويلايىق»،- دەپ سۇرادى المالى اۋدانىنىڭ تۇرعىنى.
ەربولات دوسايەۆ بيىل قالا كۇنىنە وراي ءىس-شارالاردى وتكىزۋدىڭ باعدارلاماسى ازىرلەنىپ جاتقانىن ايتتى.
«بيىل قىركۇيەك ايىندا قالا كۇنىن تويلايمىز. ونىڭ اياسىندا مادەني-كوپشىلىك شارالار ۇيىمداستىرىلادى. دۇيسەنبى كۇنى باعدارلامانى بەكىتەمىز»، - دەپ جاۋاپ بەردى قالا باسشىسى.