الماتىدا كەمىرگىشتەردىڭ سانى مەن تارالۋىن ازايتۋعا باعىتتالعان كەشەندى سانيتارلىق جۇمىس قولعا الىندى. بۇل قالانىڭ سەگىز اۋدانىنىڭ بارلىق اۋماعىن قامتىپ، تۇرعىنداردىڭ دەنساۋلىعى مەن تۇرمىس جايلىلىعى ءۇشىن سانيتارلىق قاۋىپسىزدىك دەڭگەيىن ارتتىرۋعا باعىتتالعان. بۇل تۋرالى قوعامدىق ينفراقۇرىلىم جانە تۇرعىن ءۇي ينسپەكسياسى باسقارماسى حابارلادى.
"ەكو سەرۆيس الماتى" جانە "Ala Comfort" كومپانيالارىنىڭ مالىمەتىنشە، بۇگىنگە دەيىن 47 مىڭ گەكتاردان استام اۋماق دارىلەندى، 138 مىڭنان اسا تۇرعىن ءۇي نىسانى تۇراقتى باقىلاۋدا تۇر. جۇمىسقا كۇن سايىن ءتورت ماماننان تۇراتىن 10 ءموبيلدى توپ قاتىسادى.
دەراتيزاسيا جوسپارعا سايكەس، سانيتارلىق تالاپتى ساقتاي وتىرىپ، جىل بويى جۇيەلى تۇردە جۇرگىزىلەدى. قولدانىلاتىن بارلىق پرەپارات سانيتاريالىق-ەپيدەميولوگيالىق ساراپتامادان وتكەن، ادام، ءۇي جانۋارلارى مەن قورشاعان ورتا ءۇشىن ءقاۋىپسىز.
دارىلەۋ جۇمىسى جەرتولەلەردە، كونتەينەر الاڭدارىندا، ينجەنەرلىك قۇدىقتاردا جانە كەمىرگىشتەر ءجيى شوعىرلاناتىن تابيعي اۋماقتاردا جۇرگىزىلىپ جاتىر. پرەپاراتتاردىڭ اسەر ەتۋ مەرزىمى – جەتى كۇن. وسىدان كەيىن ماماندار تەكسەرىس جۇرگىزىپ، قاجەت بولعان جاعدايدا جەم شاشادى.
جەكە سەكتور تۇرعىندارى ءۇشىن اۋلا اۋماقتارىن وزدىگىنەن دارىلەۋگە ارنالعان ءتيىمدى قۇرالدار تەگىن بەرىلەدى.
مامانداردىڭ ايتۋىنشا، كەمىرگىشتەردىڭ كۇز ماۋسىمىندا بەلسەندى بولا تۇسەدى. سوندىقتان تۇرعىندارعا: قوقىستى كونتەينەردەن تىس قالدىرماۋ، جەرتولەلەردى تازا ۇستاۋ، كەمىرگىشتەردىڭ كوبەيۋىنە جول بەرمەۋ سىندى سانيتارلىق ءتارتىپتى ساقتاۋدىڭ ماڭىزى ەسكە سالىنادى.
"ەكو سەرۆيس الماتى" كومپانياسى وكىلدەرى اتاپ وتكەندەي، دەراتيزاسيا – ءبىر رەتتىك ناۋقان ەمەس، ۇزدىكسىز اتقارىلاتىن سانيتارلىق جۇمىس. بۇل ۇدەرىس كوممۋنالدىق قىزمەتتەردىڭ عانا ەمەس، قالا تۇرعىندارىنىڭ دا بىرلەسكەن جاۋاپكەرشىلىگىن تالاپ ەتەدى. نەگىزگى ماقسات – الماتىنى تازا، ءقاۋىپسىز ءارى جايلى ەتۋ.