تۋرنيرگە قازاقستاننىڭ تۇكپىر-تۇكپىرىنەن مەكتەپ وقۋشىلارى، كوللەدجدەر مەن جوو ستۋدەنتتەرى، كاسىپكەرلەر، سونىمەن قاتار، ءبىلىم بەرۋ يدەيالارى مەن جوبالارىنىڭ اۆتورلارى قاتىستى.
TechCup روبوتوتەحنيكا جانە يننوۆاسيالىق تەحنولوگيالار بويىنشا ەكى كۇندىك چەمپيونات Almaty Arena مۇز سارايىنىڭ الاڭىندا ءوتتى، دەپ حابارلايدى Almaty-akshamy.kz
چەمپيوناتقا بارلىعى 7-22 جاس ارالىعىنداعى 1300-دەن استام قاتىسۋشىدان تۇراتىن 704 كوماندا قاتىستى. TechCup-2022 جۇلدە قورى 4،6 ملن تەڭگە.
اكىم كۋبوگى مەن 1 ملن تەڭگەنى، ياعني باس جۇلدەنى الماتى قالاسى نازاربايەۆ زياتكەرلىك مەكتەبى حيميا-بيولوگيالىق بولىمشەسىنىڭ كومانداسى يەلەندى.
I دارەجەلى ديپلومدى 24 كوماندا؛ II دارەجەلى ديپلومدى - 37 كوماندا؛ III دارەجەلى ديپلومدى - 61 كوماندا الدى.
بۇعان قوسا، چەمپيوناتقا قاتىسۋشىلارعا رەسپۋبليكانىڭ ۇزدىك جوعارى وقۋ ورىندارىنان 4 جىل ىشىندە وقۋعا 18 گرانت ءبولىندى. اتاپ ايتقاندا، قازاقستان-بريتان تەحنيكالىق ۋنيۆەرسيتەتىندە وقۋعا 5 گرانت؛ حالىقارالىق ينجەنەرلىك-تەحنولوگيالىق ۋنيۆەرسيتەتكە 5 گرانت؛ حالىقارالىق اقپاراتتىق تەحنولوگيالار ۋنيۆەرسيتەتىنە 5 گرانت؛ ق.ي. ساتبايەۆ اتىنداعى قازاق ۇلتتىق زەرتتەۋ ۋنيۆەرسيتەتىنە 3 گرانت ءبولىندى. 18 گرانتتىڭ 10-ىن الماتى قالاسى مەكتەپتەرىنىڭ تۇلەكتەرى ەنشىلەدى.
چەمپيوناتتى الماتى قالاسىنىڭ ءبىلىم باسقارماسى ۇيىمداستىردى.