بۇعان دەيىن وسى باعدارلاما اياقتالادى دەپ ايتىلعان.
ەلىمىزدەگى «7-20-25» يپوتەكالىق تۇرعىن ءۇيدى نەسيەلەندىرۋ باعدارلاماسى ۇزارتىلاتىن بولدى، دەپ حابارلايدى Almaty-akshamy.kz ۇلتتىق بانكتىڭ باسپا ءسوز قىزمەتىنە سىلتەمە جاساپ.
«قازاقستان رەسپۋبليكاسىنىڭ پرەزيدەنتى توقايەۆتىڭ تاپسىرماسى بويىنشا «7-20-25» يپوتەكالىق تۇرعىن ءۇي كرەديتتەۋ باعدارلاماسىن ىسكە اسىرۋ جالعاستىرىلادى. ءتيىستى شەشىم قازاقستان رەسپۋبليكاسى ۇلتتىق بانكى باسقارماسىنىڭ 2022 جىلعى 19 جەلتوقسانداعى № 123 قاۋلىسىمەن قابىلداندى»، - دەلىنگەن حابارلامادا.
رەسمي مالىمەت بويىنشا، 2023 جىلى باعدارلاما بويىنشا كرەديتتەۋ ءۇشىن 100 ميلليارد تەڭگەگە دەيىن قاراجات ءبولۋ جوسپارلانعان. باعدارلاما بويىنشا جىل سايىنعى كرەديتتەۋدىڭ ناقتى كولەمى نارىقتاعى بانكتەردىڭ نارىقتىق يپوتەكالىق ونىمدەرى مەن ولاردىڭ دامۋىنا بايلانىستى بەلگىلەنەدى دەپ كوزدەلىپ وتىر.
«جەڭىلدەتىلگەن كرەديتتەۋمەن ازاماتتاردى كوبىرەك قامتۋ ماقساتىندا باعدارلامانى ىسكە اسىرۋدىڭ جەكەلەگەن تالاپتارى قايتا قارالدى. اتاپ ايتقاندا، ءاربىر قارىز الۋشى باعدارلاماعا ءبىر رەت قانا قاتىسا الادى. باعدارلاما اياسىندا بەرىلەتىن يپوتەكالىق تۇرعىن ءۇي قارىزدارىنىڭ پارامەترلەرى (باستاپقى جارنانىڭ ەڭ تومەنگى مولشەرى، قارىزدىڭ ەڭ جوعارى سوماسى، سىياقى مولشەرلەمەسى، قارىز مەرزىمى، وڭىرلەر بولىگىندە ساتىپ الىناتىن تۇرعىن ءۇيدىڭ ەڭ جوعارى قۇنى جانە ت.ب.) وزگەرىسسىز قالادى»، - دەلىنگەن ۇب حابارلاماسىندا.
2022 جىلعى 22 جەلتوقسانداعى جاعداي بويىنشا، 852،2 ميلليارد تەڭگە كولەمىندە 64 146 جەڭىلدەتىلگەن قارىز بەرىلگەن.
باعدارلاما جۇمىس ىستەيتىن ازاماتتاردى 20 پايىزدان باستاپ باستاپقى جارنامەن جىلدىق 7 پايىز جەڭىلدەتىلگەن مولشەرلەمە بويىنشا 25 جىلعا دەيىنگى مەرزىمگە قولجەتىمدى يپوتەكامەن قامتاماسىز ەتۋ ءۇشىن 2018 جىلى ىسكە قوسىلعان.