بيىلعى قاڭتار ايىندا الماتى قالاسىندا بولعان جاپپاي تارتىپسىزدىكتەردى ۇيىمداستىرۋشىلار مەن قىلمىس جاساعانداردى، زاڭسىز قارۋ اينالىمدارىن انىقتاۋ جۇمىسىنا الماتى قالاسى بويىنشا قىلمىستىق-اتقارۋ جۇيەسى دەپارتامەنتى مەن وعان قاراستى مەكەمەلەردىڭ جەدەل قىزمەتتەرى دە بەلسەندى تۇردە قاتىسۋدا، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى قالاسىنداعى تەرگەۋ يزولياتورى جەدەل قىزمەتىنىڭ اقپاراتى بويىنشا، ىشكى ىستەر مينيسترلىگىنىڭ قىزمەتكەرلەرى قاڭتار قىرعىنىنا بەلسەندى قاتىسقان جانە قالاداعى “الپامىس” قارۋ دۇكەنىنەن قارۋ توناعان كۇدىكتىنى قولعا ءتۇسىردى.
جاپپاي تارتىپسىزدىك كەزىندە قارۋ توناعانىن مويىنداعان كۇدىكتى ا. تۇراتىن ۇيدەن "ۆەپر" ماركالى وتتى قارۋ تاركىلەندى. جىل باسىنان بەرى الماتى قالاسى بويىنشا قىلمىستىق-اتقارۋ جۇيەسى دەپارتامەنتى جەدەل قىزمەتىنىڭ اقپاراتى بويىنشا، الماتى قالاسىنىڭ اۋماعىندا 7 قارۋ-جاراق قويماسى انىقتالىپ، 25 وتتى قارۋ، 31 گراناتا، ءارتۇرلى كاليبرلى 1259 پاترون، ارناۋلى قۇرالدار جانە پوليسيا قىزمەتكەرلەرى مەن اسكەريلەردىڭ نىساندى كيىمى تاركىلەندى.