2022 جىلدىڭ ءبىرىنشى جارتىجىلدىعىندا ەكونوميكا 3،4%-عا ءوستى.
ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى +/– 1،0 پ.ت. پايىزدىق دالىزىمەن جىلدىق 14،5% دەڭگەيىندە بەلگىلەۋ تۋرالى شەشىم قابىلدادى، دەپ حابارلايدى Almaty-akshamy.kz.
«تيىسىنشە، وتىمدىلىكتى ۇسىنۋ جونىندەگى تۇراقتى قولجەتىمدى وپەراسيالار بويىنشا مولشەرلەمە 15،5%، ال وتىمدىلىكتى الۋ جونىندەگى تۇراقتى قولجەتىمدى وپەراسيالار بويىنشا مولشەرلەمە 13،5% بولادى»، - دەلىنگەن ۇلتتىق بانكتىڭ باسپا ءسوز قىزمەتىنىڭ حابارلاماسىندا.
قارجىلىق ۇيىمنىڭ مالىمەتىنشە، ناقتى ينفلياسيا ينفلياسيالىق كۇتۋلەردىڭ جەدەلدەۋى اياسىندا بولجامدى كورسەتكىشتەن ەداۋىر اسىپ ءتۇستى. تۇتىنۋشىلىق باعالاردىڭ ورنىقتى قۇرامداس بولىكتەرى، سول سياقتى باعانىڭ جالپى دەڭگەيى ءوسىپ كەلەدى. بيىلعى مامىردا جانە ماۋسىمدا قالىپتاسقان ينفلياسيا شارىقتاۋ شەگىنەن وتپەگەنىن كورسەتەدى.
جوعارى ينفلياسيالىق كۇتۋلەر پروينفلياسيالىق قىسىمدى كۇشەيتۋدە. ۇلتتىق بانكتىڭ باعالاۋىنا سايكەس، 2022 جىلدىڭ قورىتىندىسى بويىنشا ينفلياسيا بۇرىنعى بولجامنان اسىپ تۇسەدى. جاڭا كۇتپەگەن وزگەرىستەر ورىن الماعان جاعدايدا ينفلياسيانىڭ جىلدىق ءوسۋى 2023 جىلدىڭ ءبىرىنشى توقسانىنا دەيىن جالعاسىپ، ودان ءارى باياۋلايدى.
بۇل شەشىم 2023 جىلى ينفلياسيالىق پروسەستەر مەن كۇتۋلەردى تۇراقتاندىرىپ، باياۋلاتۋعا جانە ينفلياسيانى ورتا مەرزىمدى پەرسپەكتيۆادا نىسانالى كورسەتكىشكە جاقىنداتۋعا باعىتتالعان. قالىپتاسقان ينفلياسيالىق پروسەستەردىڭ ورنىقتىلىعى، سۇرانىستى فيسكالدىق ىنتالاندىرۋ جانە سىرتقى پروينفلياسيالىق احۋال حالىقتىڭ قاراجات جيناقتاۋ نيەتىن ىنتالاندىرۋ ءۇشىن ۇزاق ۋاقىت بويى بازالىق مولشەرلەمەنى قازىرگى دەڭگەيدە ۇستاپ تۇرۋدى تالاپ ەتەدى، بۇل كەلەسى جىل ىشىندە ينفلياسياعا بىرتىندەپ اسەر ەتەتىن بولادى.
2022 جىلعى ماۋسىمدا جىلدىق ينفلياسيا 14،5%-عا دەيىن جەدەلدەدى. بارلىق قۇرامداس بولىكتەر بويىنشا باعا ءوسىپ كەلەدى – ازىق-تۇلىك تاۋارلارى (19،2%)، ازىق-تۇلىككە جاتپايتىن تاۋارلار (13،2%) جانە اقىلى قىزمەتتەر (9،2%). بۇل جەتكىزۋ تىزبەگىندەگى ىركىلىستەرگە، سىرتقى ينفلياسيالىق قىسىمنىڭ كۇشەيۋىنە بايلانىستى شىعاسىلار ينفلياسياسىنىڭ ءوسۋى، سونداي-اق فيسكالدىق ىنتالاندىرۋدان قولداۋ تاپقان جوعارى سۇرانىس پەن تەڭگە باعامىنىڭ السىرەۋىنەن تۋىنداپ وتىر.
بازالىق ينفلياسيا جالپى ينفلياسيادان وزىپ، باعانىڭ ورنىقتى ءوسۋ فاكتورلارىنىڭ باسىمدىعىن كورسەتە وتىرىپ، قايتادان ۇدەي باستادى. ينفلياسيالىق كۇتۋلەر دە ۇدەگەنىن كورسەتتى – 2022 جىلعى ماۋسىمدا كۇتىلەتىن ينفلياسيانىڭ مەديانالىق باعاسى ءبىر جىل ىشىندە 14،9%-عا دەيىن (مامىردا – 13،8%) ءوستى.
مامىر-ماۋسىمدا ناقتى ينفلياسيانىڭ جانە ينفلياسيالىق كۇتۋلەردىڭ نەعۇرلىم جوعارى دەڭگەيدە قالىپتاسۋىن ەسكەرە وتىرىپ، ۇلتتىق بانك 2022 جىلى جىلدىق ينفلياسيانىڭ بۇرىن ايتىلعان 13-15% بولجامىنىڭ جوعارعى شەگىنەن دە جوعارى جەدەلدەۋىن كۇتەدى. جاڭا باعالاۋ كەلەسى بولجامدى راۋند اياسىندا جۇرگىزىلەدى.
2022 جىلدىڭ ءبىرىنشى جارتىجىلدىعىندا ەكونوميكا 3،4%-عا ءوستى، بۇل جالپى ۇلتتىق بانكتىڭ بولجامدارىنا 2022 جىلدىڭ سوڭىنا دەيىن 2،8-3،8% دەڭگەيىندە سايكەس كەلەدى. ەكونوميكانىڭ بارلىق نەگىزگى سالالارى وسۋدە، ءبىراق كەيبىر سالالاردا ىركىلىس بار. ماسەلەن، قاشاعان كەن ورنىنداعى جوندەۋ جۇمىستارىنا بايلانىستى تاۋ-كەن ونەركاسىبىنىڭ ءوسىمى باياۋلادى. سونىمەن بىرگە، ينفلياسيالىق پروسەستەردىڭ جەدەلدەۋىنە قاراماستان، ساۋدا كورسەتكىشتەرى تۇراقتى سۇرانىستى كورسەتەدى. جيىنتىق سۇرانىس جىلدىق ءوسۋى جەدەلدەگەن جانە ماۋسىمدا 18،7%-دى قۇراعان ەلەۋلى مەملەكەتتىك شىعىستارمەن ىنتالاندىرىلۋدا. بۇل ماڭىزدى پروينفلياسيالىق فاكتور سانالادى جانە مونەتارلىق جاعدايلاردى تيىسىنشە رەتتەۋدى تالاپ ەتەدى.
الەمدىك ەكونوميكانىڭ ءوسۋى بويىنشا بولجام تومەندەۋ جاعىنا قاراي قايتا قارالدى. دۇنيەجۇزىلىك بانك 2022 جىلى جاھاندىق ەكونوميكانىڭ بولجامدى ءوسىمىن 4،1%-دان 2،9%-عا دەيىن تومەندەتتى. قازاقستاننىڭ ساۋدا ارىپتەسى سانالاتىن ەلدەر بويىنشا ءوسۋ بولجامى دا: رەسەي بويىنشا 2،4%-دان مينۋس 8،9%-عا دەيىن، ەو بويىنشا 4،2%-دان 2،5%-عا دەيىن، جۇڭگو بويىنشا 5،1%-دان 4،3%-عا دەيىن تومەندەدى. گەوساياسي قاقتىعىس، قىتايداعى كارانتيننىڭ ىقتيمال كۇشەيۋى، جەتكىزىلىم تىزبەگىندەگى ىركىلىستەردىڭ سالدارىنان الەمدىك ەكونوميكادا ءالسىز دامۋ تاۋەكەلى ساقتالىپ وتىر.
2022 جىلعى شىلدەنىڭ باسىندا ورىن العان ءبىراز قىسىمنان كەيىن مۇناي باعاسىنىڭ ءوسۋى قايتا قالپىنا كەلدى. اقش دوللارىنىڭ ەڭ جوعارى ماندەردەن ءبىرشاما السىرەۋى جانە مۇناي قورىنىڭ شەكتەۋلى بولۋى مۇناي باعاسىن ۇستاپ تۇر. EIA باعالاۋىنا سايكەس، الەمدىك ەكونوميكانىڭ ءوسۋ پەرسپەكتيۆالارىنىڭ ناشارلاۋىن ەسكەرە وتىرىپ، 2022 جىلدىڭ 3-توقسانىندا Brent باعاسى ورتا ەسەپپەن 104 اقش دوللارىن، جىل سوڭىنا قاراي – باررەلىنە 95 اقش دوللارىن، 2023 جىلى – باررەلىنە 90 دوللاردان جوعارى كورسەتكىشتى قۇرايدى.
الەمدە جوعارى ينفلياسيالىق احۋال ساقتالىپ، سىرتقى مونەتارلىق جاعدايلار كۇشەيە باستادى. فاو ازىق-تۇلىك باعالارىنىڭ يندەكسى ماۋسىمدا، نەگىزىنەن، وسىمدىك مايلارى، ءداندى داقىلدار مەن قانت ەسەبىنەن 2،3%-عا تومەندەدى، ءبىراق ءالى دە وتكەن جىلعى كورسەتكىشتەن 23،1%-عا جوعارى شىعىپ، تاريحي ەڭ جوعارى كورسەتكىشتەرگە جۋىقتادى.
2022 جىلعى ماۋسىمدا ەنەرگيا تاسىمالداۋشىلار مەن ازىق-تۇلىك باعاسىنىڭ وسۋىنە بايلانىستى اقش پەن ەو-داعى جىلدىق ينفلياسيا، تيىسىنشە، 9،1% جانە 9،6% بولىپ، تاريحي ەڭ جوعارى كورسەتكىشتەرگە جەتتى. جوعارى ينفلياسيالىق قىسىم جاعدايىندا اقش فرج 2022 جىلعى ماۋسىمدا مولشەرلەمەنى جىلدىق 1،5%-1،75%-عا دەيىن بىردەن 0،75 پ.ت. (1994 جىلدان باستاپ العاش رەت) كوتەردى، ەندى بيىل جانە كەلەسى جىلدارى مولشەرلەمەنى ودان ءارى كوتەرەتىنى تۋرالى بەلگى بەرە باستادى. ءوز كەزەگىندە، ەوب 11 جىل ىشىندە العاش رەت پايىزدىق مولشەرلەمەنى 0،5 پ.ت. ارتتىردى. رەتتەۋشى الداعى ايلاردا مولشەرلەمەنىڭ ودان ءارى ءوسۋ ىقتيمالدىعى تۋرالى دا حابارلادى.
بازالىق مولشەرلەمە بويىنشا كەلەسى شەشىم جازعى بولجامدى راۋندتىڭ جانە ماكروەكونوميكالىق كورسەتكىشتەردىڭ جاڭارتىلعان بولجامدى كورسەتكىشتەرىنىڭ، سىرتقى ورتاداعى جانە ىشكى ەكونوميكاداعى تاۋەكەلدەر تەڭگەرىمىنىڭ قورىتىندىسى بويىنشا قابىلدانادى. ۇلتتىق بانكى اقشا-كرەديت ساياساتى كوميتەتىنىڭ بازالىق مولشەرلەمە بويىنشا كەزەكتى جوسپارلى شەشىمى 2022 جىلى 5 قىركۇيەكتە ساعات 14:00-دە جاريالانادى. سول كۇنى نۇر-سۇلتان ۋاقىتىمەن ساعات 16:00-دە باسپا ءسوز بريفينگى وتكىزىلەدى.