الماتى قالاسى بويىنشا سىبايلاس جەمقورلىققا قارسى قىزمەت «زاڭ جانە ءتارتىپ» باستاماسى اياسىندا الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ (قاجد) №13 مەكەمەسىندە سەمينار-كەڭەس وتكىزدى. بۇل تۋرالى Aqshamnews.kz سايتى حابارلايدى. جيىننىڭ باستى ماقساتى – قىلمىستىق-اتقارۋ جۇيەسىندەگى سىبايلاس جەمقورلىقتىڭ الدىن الۋ جانە ونىڭ تاۋەكەلدەرىن ازايتۋ بولدى.
سەمينارعا تۇزەۋ مەكەمەسىنىڭ قىزمەتكەرلەرى، قاداعالاۋ قىزمەتىنىڭ وكىلدەرى جانە 200-دەن استام سوتتالعان ازامات قاتىستى. ءىس-شارا بارىسىندا قىلمىستىق-اتقارۋ جۇيەسىندەگى اشىقتىقتى قامتاماسىز ەتۋ، زاڭ تالاپتارىنىڭ ساقتالۋىن كۇشەيتۋ جانە سوتتالعانداردى قايتا تاربيەلەۋ شارالارىنىڭ تيىمدىلىگى تالقىلاندى.
الماتى قالاسى بويىنشا سىبايلاس جەمقورلىققا قارسى قىزمەتتىڭ الدىن الۋ باسقارماسىنىڭ باسشىسى قانات ساليمبايەۆ نەگىزگى بايانداما جاساپ، قۇقىقتىق مەملەكەتتىڭ دامۋىندا زاڭدىلىق پەن اشىقتىقتىڭ ماڭىزدىلىعىن اتاپ ءوتتى. ول قىزمەتكەرلەر مەن سوتتالعانداردىڭ سىبايلاس جەمقورلىق تاۋەكەلدەرىنەن اۋلاق بولۋى قاجەتتىگىن، بۇل ءۇشىن قوعامدىق جانە ىشكى باقىلاۋ تەتىكتەرىن كۇشەيتۋ كەرەكتىگىن ايتتى.
كەزدەسۋ بارىسىندا قىلمىستىق-اتقارۋ جۇيەسى قىزمەتكەرلەرىنىڭ ادەپ قاعيدالارىن ساقتاۋىنا جانە قىزمەتتىك مىندەتتەرىن ادال ورىنداۋىنا ەرەكشە كوڭىل ءبولىندى. سونداي-اق، سوتتالعانداردىڭ قۇقىعىن قورعاۋ ماسەلەسى كوتەرىلىپ، ولار وزدەرىنىڭ قاماۋدا ۇستالۋى زاڭ تالاپتارىنا سايكەس ەكەنىن جانە تۇزەۋ مەكەمەسى قىزمەتكەرلەرىنىڭ ىس-ارەكەتىنە شاعىمدارى جوق ەكەنىن جەتكىزدى. سونىمەن قاتار، كەيبىر سوتتالعاندار جازانى جەڭىلدەتۋ ماسەلەسىندە سوت شەشىمدەرىنىڭ ارتۇرلىلىگىنە الاڭداۋشىلىق ءبىلدىردى.
قانات ساليمبايەۆ سوتتالعاندارعا سىبايلاس جەمقورلىق جاعدايلارىمەن بەتپە-بەت كەلگەن كەزدە قانداي ارەكەت جاساۋ كەرەكتىگىن ءتۇسىندىرىپ، سىبايلاس جەمقورلىققا قارسى قىزمەتكە جۇگىنۋ جولدارىن باياندادى. سونداي-اق، الدىن الۋ شارالارى اياسىندا سوتتالعاندارعا قىلمىستىڭ سالدارى مەن ونىڭ الدىن الۋ تاقىرىبىندا الەۋمەتتىك بەينەروليكتەر دايىنداۋعا قاتىسۋ ۇسىنىلدى.
بۇل ءىس-شارا قۇقىقتىق ءتارتىپتى نىعايتۋعا جانە حالىقتىڭ مەملەكەتتىك ورگاندارعا دەگەن سەنىمىن ارتتىرۋعا باعىتتالعان مەملەكەتتىك ساياساتتىڭ ماڭىزدى بولىگى بولىپ تابىلادى.