ۇلى وتان سوعىسىنداعى جەڭىستىڭ 80 جىلدىعىنا ارنالعان اسكەري پارادقا دايىندىق اياسىندا 13 ناۋرىزدان باستاپ جەكە قۇرامدى تاسىمالداۋ جانە اسكەري تەحنيكانىڭ قوزعالىسى باستالادى. اسكەريلەردى جەتكىزۋ جانە تەحنيكانى كوشىرۋ تەمىرجول ارقىلى دا، ءوز جۇرىسىمەن دە جۇزەگە اسىرىلادى. بۇل تۋرالى Aqshamnews.kz سايتى حابارلايدى.
وسىعان بايلانىستى ەلىمىزدىڭ كەيبىر ايماقتارىنداعى جولداردىڭ جەكەلەگەن ۋچاسكەلەرىندە كولىك قوزعالىسىنا ۋاقىتشا شەكتەۋلەر ەنگىزىلۋى مۇمكىن. ازاماتتارعا ساپارلارىن الدىن الا جوسپارلاپ، جول قوزعالىسى ەرەجەلەرىن ساقتاۋعا كەڭەس بەرىلەدى.
سونىمەن قاتار، 2025 جىلعى 22 ءساۋىر مەن 7 مامىر ارالىعىندا اسكەري اۆياسيانىڭ جاتتىعۋ ۇشۋلارىن وتكىزۋ ءۇشىن استانا قالاسىنىڭ اۋە كەڭىستىگىنە قىسقا مەرزىمدى شەكتەۋلەر قويىلادى. بۇل اۋە رەيستەرىنىڭ كەستەسىنە اسەر ەتۋى مۇمكىن، سوندىقتان جولاۋشىلارعا رەيستەر تۋرالى اقپاراتتى الدىن الا ناقتىلاپ الۋعا كەڭەس بەرىلەدى.
رەسمي ورگاندار ەنگىزىلگەن شەكتەۋلەرگە تۇسىنىستىكپەن قاراۋدى، جالعان اقپارات تاراتپاۋعا جانە تەك رەسمي دەرەككوزدەرگە جۇگىنۋدى سۇرايدى.