ەكولوگ كۇنىنە وراي الماتى قالاسىندا قايتا وڭدەلگەن پلاستيكتەن جاسالعان العاشقى اقپاراتتىق تاقتايشا ورناتىلدى. بۇل باستاما ەكولوگيا مەن تۇراقتى دامۋ ماسەلەلەرىنە قوعام نازارىن اۋدارۋعا باعىتتالعان.
تاقتايشادا اعاش تۋرالى مالىمەتتەر، ياعني ونىڭ ءتۇرى، جاسى جانە ەرەكشەلىكتەرى كورسەتىلگەن. ازىرگە مۇنداي تاقتايشا ماقاتايەۆ كوشەسى مەن نازاربايەۆ داڭعىلىنىڭ قيىلىسىندا ورنالاسقان 1888 جىلى وتىرعىزىلعان ەمەن اعاشىنىڭ جانىندا ورناتىلدى. بولاشاقتا الەمنىڭ جەتەكشى مەگاپوليستەرىنىڭ تاجىريبەسىنە سۇيەنە وتىرىپ، قالاداعى كوپجىلدىق اعاشتاردىڭ باسىم بولىگى وسىنداي تاقتايشامەن جابدىقتالماق.
بۇل قادام قالا تۇرعىندارىنىڭ ەكولوگيالىق ساناسىن قالىپتاستىرۋعا باعىتتالعان اۋقىمدى باعدارلامانىڭ ءبىر بولىگى. رەسپۋبليكالىق «تازا قازاقستان» باستاماسى مەن «الماتى – ءبىزدىڭ ورتاق ءۇيىمىز» قالالىق باعدارلاماسى اياسىندا شاھاردا قوقىستى سۇرىپتاپ جيناۋ جۇيەسىن ەنگىزۋ جانە سانالى تۇتىنۋ مادەنيەتىن دامىتۋ بويىنشا تۇراقتى تۇردە ەكولوگيالىق ءىس-شارالار مەن اكسيالار وتكىزىلىپ كەلەدى.
الماتى قالاسى اكىمدىگى جانىنداعى جوبالىق كەڭسەنىڭ قولداۋىمەن اشىلعان العاشقى ەكوحاب بازاسىندا (ماركوۆ كوشەسى، 44) جينالعان پلاستيك قاقپاقتاردان سالپىنشاقتار، تىرەۋىشتەر، تاقتايشالار، شاحمات تاقتالارى مەن فيگۋرالار، سونداي-اق، كوشە جيھازدارىنىڭ ەلەمەنتتەرى سىندى پايدالى ءارى ساندىك بۇيىمدار جاسالىپ وتىر.