الماتىدا قاي جەرلەردە شومىلۋعا بولادى؟

الماتىدا رۇقسات ەتىلگەن تەك 4 شومىلۋ ورنى بار.

رەسپۋبليكالىق جەدەل-قۇتقارۋ جاساعى بىلتىر شومىلۋ ماۋسىمىندا 17 ادامدى اجالدان اراشالاپ قالدى. ونىڭ التاۋى - بالا. ولار ءتيىس ەرەجەلەردى ەسكەرمەي بارىپ، سۋعا باتقان. ال قۇتقارۋشىلاردىڭ ايتۋىنشا، الماتىدا رۇقسات ەتىلگەن تەك 4 شومىلۋ ورنى بار، دەپ حابارلايدى اlmaty-akshamy.kz almaty.tv-عا سىلتەمە جاساپ.

«ءبىز ەرەكشە قيىن جاعدايدا دا قۇتقارۋعا بارامىز. ول ءۇشىن ارنايى دايىندىقتان وتەمىز. قىسىمى جوعارى، اۋا تەمپەراتۋراسى تومەن، جۇرەككە جۇكتەمە ءجيى تۇسەتىن جەرلەردە دە جۇمىس ىستەيمىز. ال سۋدىڭ استىنا سۇڭگىپ جاتساق، ءوزىمىزدىڭ ارنايى تۇسىنىسەتىن ءتىلىمىز بار. ياعني، ءبىر رەت ارقان تارتۋ - وڭعا، ەكى رەت سىلكىسەڭ - سولعا، ارقاندى ءۇش رەت تارتۋ - ول سۋدان شىعار دەگەندى بىلدىرەدى»، - دەدى ق ر تجم رەسپۋبليكالىق جەدەل-قۇتقارۋ جاساعى بولىمشەسىنىڭ باسشىسى اندرەي بىبچەنكو.

قۇتقارۋ قىزمەتىنىڭ قاجەتىنە جارايتىن تاعى ءبىر ماڭىزدى قۇرال - موتورلى قايىق. جىلدامدىعى مەن جەڭىل ءجۇرىسىنىڭ ارقاسىندا سۋ كولىگىن باسقارۋ دا وڭاي. ال ادام ءومىرىن اجالدان اراشالاپ قالۋدا ۋاقىت ۇتۋ وتە ماڭىزدى.

«الماتىدا بارلىعى 4 شومىلۋ ورىنى بەكىتىلگەن. ولار سايران كولىنىڭ باتىس جانە شىعىس بولىگى، د. قونايەۆ اتىنداعى ۇلكەن الماتى كانالى بويىنداعى «گۇلدەر» دەمالىس ورنى جانە باۋم توعايى. قالعان سۋ ايدىندارى مەن تاۋلى وزەندەردە شومىلۋعا تىيىم سالىنعان. سايران كولىندە بىزدە 17 ادام قۇتقارىلدى. ونىڭ التاۋى – بالا»، - دەدى ق ر تجم ازاماتتىق قورعانىس باسقارماسىنىڭ اعا وفيسەرى ەسبول سۇلتانوۆ.