بيىل جايسىز وتباسى رەتىندە ەسەپكە الىنعاندار سانى - 75.
اتىراۋدا بالا تاربيەسىنە بايلانىستى مىندەتتەرىن ورىنداماعان 8 ادام اتا-انا قۇقىعىنان ايىرىلۋى مۇمكىن، دەپ حابارلايدى اlmaty-akshamy.kz قازاقپاراتقا سىلتەمە جاساپ.
وبلىس اكىمىنىڭ ورىنباسارى جاسۇلان بيسەمبييەۆتىڭ توراعالىعىمەن وتكەن كوميسسيا وتىرىسىندا كامەلەتكە تولماعانداردىڭ قۇقىعىن قورعاۋ ماسەلەسى قارالدى. وندا اتىراۋ قالاسىندا جاسوسپىرىمدەر ماسەلەسى تالقىلاندى.
«بىلتىر كوميسسيا وتىرىسىندا يۋۆەنالدى پوليسيا ءبولىمى مەن ءبىلىم بەرۋ مەكەمەلەرىنىڭ ۇسىنىستارى بويىنشا 116 ءىس قارالدى. ال، كوميسسيانىڭ بيىلعى 8 وتىرىسىندا 47 جاسوسپىرىمگە قاتىستى ىسكە تالداۋ جاسالدى. ونىڭ ىشىندە كامەلەتكە تولماعان 3 وقۋشى ۇزاق ۋاقىت بويى ساباققا بارماعانى انىقتالدى. كوميسسيا وقۋدان جالتارعان جاسوسپىرىمدەردى ارناۋلى مەكتەپكە ورنالاستىرۋعا بايلانىستى ءتيىستى قاۋلىسى شىعاردى. بالالارىنىڭ تاربيەسى مەن ءبىلىم الۋىنا بايلانىستى اتا-انالىق مىندەتتەرىن ورىنداماعانى ءۇشىن 8 ادامدى اتا-انا قۇقىعىنان ايىرۋ تۋرالى قاۋلى شىعىپ، سوتقا جىبەرىلدى. ءتورت جاسوسپىرىمگە ءتارتىبىن تۇزەۋ ءۇشىن سىناق مەرزىمى بەرىلدى. ءۇش اتا-انا وبلىستىق ناركولوگيالىق ديسپانسەرگە 30 كۇن ەم قابىلداۋعا جاتقىزىلدى»، - دەپ حابارلادى اتىراۋ قالاسى اكىمىنىڭ ورىنباسارى نۇرجان ەرمۇحانوۆ.
ونىڭ ايتۋىنشا، جايسىز وتباسىندا تاربيەلەنىپ، پوليسيا ەسەبىنە الىنعان بالالار قوعامدىق ءتارتىپتى بۇزۋعا، قىلمىس جاساۋعا بەيىم بولعانى انىقتالعان. بىلتىر جايسىز وتباسى ەسەبىنە الىنعاندار سانى – 94. بيىل بۇل ەسەپتە 75 وتباسى تۇر.
«كامەلەتكە تولماعاندار ماسەلەسى جانە ولاردىڭ قۇقىعىن قورعاۋ جونىندەگى كوميسسيا مۇشەلەرى پوليسيا قىمەتكەرلەرىمەن بىرگە ايىنا ەكى رەت جايسىز وتباسىلاردىڭ تۇرعىلىقتى مەكەنججايىنا تەكسەرۋ جۇرگىزەدى. ەڭ باستىسى، كامەلەتكە تولماعان جاسوسپىرىمدەردىڭ قۇقىعىن بۇزباۋ ماسەلەسىنە نازار اۋدارىلىپ وتىر»، - دەپ ءمالىم ەتتى نۇرجان ەرمۇحانوۆ.